Isumaqatigiissutit aalajangersimasut iluaqutigalugit piffissamut 2008-2013-mut inuiaqatigiit 197 mio. kr.-nik sipaaruteqarput

Ikummatissat imerpalasut akiisa 1. August 2014 akitsornerannut tunngatillugu itisiliineq.

Ikummatissat imerpalasut (gasolie, benzin aamma petroleum) akiisa 1. August 2014 qaffanneqarnerannut oqallinneq KNI A/S Polaroilip malinnaavigivaa akitsuisariaqarsimanermullu tunngaviusut manna aqqutigalugu itisilerusullugit. 

Ikummatissanik imerpalasunik nunatsinnut tamarmut pilersuinissamut KNI A/S Polaroil kisermaassisutut inissisimanngilaq kiffartuussinissarli pillugu Namminersorlutik Oqartussat isumaqatigiissuteqarfinerisigut pilersuisussaatitaalluni. Kiffartuussinissamut isumaqatigiissut aningaasartaqanngilaq tassanili aalajangersarneqarpoq kiffartuussisussaatitaanermut isumaqatigiissutip iluaniittut ingerlatat eqqarsaatigalugit Polaroil qanoq annertutigisumik iluanaaruteqarsinnaanersoq. Ikummatissat imerpalasut nunatsinni tuniniarneqarneranni niuernermi periutsit naliginnaasut atorneqartarput.

Uuliamik nioqqutissianik assigiinngitsunik nunatsinnut pilersuineq pisarpoq upernarneraniit ukiaaneranut umiarsuit ikummatissamik imerpalasumik usisut nunatsinnut tikittarnerisigut, usiilu Nuummi Kangerluarsorutsimilu tankersuarnut maqinneqartarput. Uuliamik nioqqutissiat tamatuma kingorna assartuutinik mikinerusunik illoqarfinnut nunaqarfinnullu assartorneqartarput.

Inoqarfiit arlallit imaatigut tikinneqartarnerat taamaallaat aasaanerani pisinnaasarpoq, soorlu Avanersuaq, Tunu taaakkulu eqqaanniittut nunaqarfiit eqqarsaatigalugit. Sumiiffiit pineqartut uninngasuutaat taamaasilluni qaammatinut 15-nut naammattussaapput.

Akit pilertarnerat

Pissutsit assigiinngitsut tunuliaqutaasarput nunatsinni atuisut akiliutigisartagaasa qanoq qaffasitsiginissaannut. Taakku ilagaat uuliap akuiarneqanngitsup akia, akuiaavinni nioqqutissiornermut akit, amerikarmiut dollariata nalinga, umiarsuit assartuinerat, sinerissamut assartuineq kiisalu tankersuarnik ingerlatsineq aserfallatsaaliinerlu.

Suliffeqarfiit selskabit (qalluisuunngitsut) aningaaseriviillu uuliamik niuernermik ingerlataqartut piffissamut killilikkamut pisiassamillu annertussusileriikkamik pisinissamut KNI A/S Polaroilimit isumaqatigiissuteqarfigineqartarput. Nunat tamalaat akornanni uuliamik niuerneq aammalu nunatsinni issittartumi avatangiisitsinnullu naleqqussakkanik uuliamik nioqqutissiornermut akuiaaviit aningaasartuutaat amerikarmiut dollariat atorlugu akilerneqartarput.  

Isumaqatigiissutit aalajangersimasut taakku iluaqutigalugit gasoliemik, benzinamik petroleumillu nunatsinni pisisartut akiliutigisartagaat ullormiit ullormut nikerarneq ajorput, nunarsuatsinnilu allanut sanilliullugu allanngorannginnerusarlutik. 

Akinik qaffaaneq

Piffissamut aalajangersimasumut pisiassanullu annertussileriikkanut 2014-mi isumaqatigiissutaasumi akiliutissat 2013-mut sanilliullugit qaffasinnerupput.

Nunarsuarmi niuerfinni akit ullut tamaasa allanngorartuaannarput. Tamatumunnga KNI A/S Polaroil sunniuteqanngilaq sunniuteqanngisaannarsimallunilu. Taamaattumik akit nalimmassartarnerat avaqqunneqarsinnaanngilaq. 

Takussutissiaq: Akit aalajangersimasut illuatungaanilu akit nikerartut nunarsuup sinnerani atuuttut

Uuliamik niuertut suliffeqarfiit (qalluisuunngitsut) aningaasariviillu akit pillugit isumaqatigiissuteqarfigisarnerat assersuunneqarsinnaavoq aningaasarivimmi atorniaraangatta ernianik akiliisarnitsinnut. Atorniaraangatta erniat aalajangersimasuussinnaapput parnaaqqasut imaluunniit nikerartuusinnaallutik. Nikerartumik ernialinnik atoraanni ernianut akiliutaasartut nunarsuatsinni pisut malillugit qummut ammullu ingerlasarput. Erniat aalajangersimasuutillugit parnaarneqarpata ernianut akiliutissaq piffissamut sivisuumut ilisimaneqareertarpoq.

Maannakkut akinik qaffaaneq illumut naliginnaasumut qanoq annertutigissava?

Illu immikkoortoq illuniluunniit sanileriiaaniittoq illu 100m2-terit missaannik angitigisoq ukiumut gasoliemik 2.500-3.000 literit missaannik atuisarpoq. Akit 1. August qaffanneqarnerat taakkununnga 112-135 kronit missaannik akiliinerusalernermik malitseqassaaq.