Tankeqarfiit Polaroilip pigisai nunarsuarmioqatitsitulli pitsaatigipput

Narsami ikummatissaasiviup ittua Kristian Stach Olsen aamma ikummatissaasiviup ittuanut ikiorti Jørgen Lang, Bureau Veritas Certificationimit pulaartoqaqqammerput. Pulaarneqarneranut peqqutaavoq, Polaroili ISO-mit nunarsuarmioqatigiinnut maleruaqqusanut pitsaassutsimut avatangiisinullu tunngasunut akuerisaanikuummat.  Maleruaqquneqartunut piumasaqaatit Polaroilimit malinneqarnersut qularnaarniarlugu, atortunik, sulisunik, aqutsisinermik, Polaroilillu ataatsimut isigalugu ingerlanneqarneranik misissuinerit ingerlanneqarput.

Taamaattumik ikummatissaasivik ikummatissaasiviullu ingerlanneqarnerata misissuiffigineqarnerani Kristian aamma Jørgen ulapissimapput.

Misissuinerit ingerlanneqarneranni sulisut aqutsisullu misilitsittarput; aqutseriaaseq, avatangiisit isumannaatsuunissamullu pissutsit pillugit Veritasimit aallartitap apersuutigisarpai. Kingorna tankeqarfik tamarmi misissorneqartarpoq, soorlu, sulisut inaat, gassiisivik, qaluniisivik tunniussisarfillu. Taassuma saniatigut sulisut ingerlatsineq suleriutsillu pillugit peqqissaartumik apersoqarneqarput uppernarsaatillu tamarmik takutissorneqarlutik.

ISOmut akuerisaanissamut piumasaqaatit ilagaat pisinianut sullissineq, taamaattumik Bureau Veritas Certification aamma Polaroilip pisisartuinut attaveqarpoq sullissineq isumannaassuserlu qanoq misigisarneraat.

ISO-mit pitsaassutsimut avatangiisinullu maleqqusat, Kristiaap Jørgennillu Narsami ikummatissaasivimminni ajornaquteqanngitsumik angusiffigaat. 

Polaroilimi pisortaq, Githa Brask Olsen: 
“Narsami suleqatigut pilluaqquakka. Iluarisimaarnarluinnarpoq ISOmut akuerisaanissamut piumasaqaatit tamaasa  naammassisinnaagatsigit. Ilutigitillugu oqarusuppunga, Polaroilip sulisuinut nunatsinnilu ikummatissaasivinnut tamanut Narsamisulli ingerlanneqartunut tuikkut pattalaartinneruvoq.“