Suliniutit taamak ittut pisariaqarput

Niuertoq Edvard Frederiksen uuliap puukuinik utertitsisoqartalernera iluarisimaarpaa.

Polaroilip plastikkip puukuinik utertitsisalernera iluatsilluangaarmat qaammammi kingullermi puukut utertinneqartut tunisaniit amerlaninngorput, tamannalu puukunik pinngortitami katersuisimanermik nassuiaatissartaqarpoq. Suliniutillu taamak ittut pisariaqartut oqariartuutigineqarpoq.

Mariane S. Heilmann Tasiusami Nanortaliup eqqaaniittumi niuertuuvoq. Puukunik utertitsisalerneq novembarimi siorna aallartinneqarmalli puukut 109-t Pilersuisoq Tasiusamut maannamut utertinneqarsimalereerput.

- Aputip aannera ilutigalugu puukut amerlanerusut utertinneqartalernerat malugaarput. Utertitsiartortut tamaasa qujaffigerusujussuartarpakka, pinngortitamummi saligaatsuutitseqataammata, puttasullu eqqaanni puukut maangaannaq eqqakkat takussaasimagaluarlutik maanna takussaajunnaarput, Mariane oqarpoq.

Pilersuisoq Tasiusami niuertoq Mariane S. Heilmann puukut utertitat eqqaanni.

Avannarterutta, Qeqertamut Ilulissat eqqaanut, puukunik utertitsisarneq tamaani aamma ingerlalluarpoq.  Puukummi katillugit 278-it utertinneqareersimapput.
- Piffissap ingerlanerani utertitsisarneq inunniit sungiukkiartorneqartoq malunnarpoq, maannamullu ingerlallualernikuulluni. Utertitsisarneq pitsaaqaaq, maluginiagassaavormi uuliat puukuinik sumi tamaani takussaasueruttoq, Qeqertami Pilersuisuimi niuertoq Edvard Frederiksen unnersiorpoq.

Pilersuisoq Qeqertami puukut utertitat.

Aalisartut aamma utertitsisalerneq pitsaasutut isigaat.
Moses Lange Qeqertani Ilulissat eqqaaniittumi aalisartuuvoq, puukunillu utertitsisalerneq iluaquterujussuartut taarusuppaa.

- Pinngortitap paarinissaa aamma eqqarsaatigalugu uuliat puukuinik utertitsisarneq isumassarsiatsialaavoq. Maluginiarnikuuara aalisartut puukunik katersisartut amerliartortut, asimullu nikikkaangatta ilaatigut aamma takussaasarput uuliap puukuinik katersisut, siusinnerusukkut soqutiginngisat. Kingulitsinnut ingerlateqqitassaq una siunertaqarpoq pitsassuarmik, Moses Lange oqarpoq.

Moses Lange, Qeqertami aalisartoq.

Aalisartoq alla, Napasumiit Erneeraq Jessen, tassunga aamma isumaqataavoq.

- Assut taperserusunnarpoq, uanga nammineerlunga uuliat taakku atortarakkit aamma. Utertitsisalerneq torrassuuvoq pinngortitamullu iluaqutaalluni, Erneeraq oqarpoq ilanngullugulu eqqaavaa sissartik eqqakkanik takussaaffiusartoq, uulialli puukuinik utertitsisalermata eqqakkat takussaasut ikililaarsimasut.

Erneeraq Jessen, Napasumi aalisartoq.

Suliniut allanngueqataavoq
Inatsisartunut Ilaasortaq Kommuneqarfik Sermersuumilu Kommunalbestyrelsemi Sanarfinermut Avatangiisinullu Ataatsimiititaliami Siulittaasoq, Justus Hansen, puukunik utertitsarnerneq torrassuussutut isigaa.

- KNI-p plastikkip puukuinik utertitsisalerneranut suliniutaata ersarissumik takutippaa, nunatsinni niuernermi sunniuteqarnerpaat ilaata plastikkinik eqqakkanik akiuiniarnermi qanoq allanngueqataasinnaatigalutik. Aaqqissuussaq taanna nunatta imartaanut nunataanullu iluaqutissartaqarpoq assut. Uagut maani nunami kusanartumi inuusugut nunatta minguitsuutinnissaanut akisussaasuuvugut, Justus Hansen oqarpoq.

 
Justus Hansen Demokraatit sinnerlugit Inatsisartuni ilaasortaavoq.

Plastikkip puukui pinngortitamiittussaanngillat
Pinngortitaleriffimmi biologip Josephine Nymandip KNI-p suliniutaa aamma nuannaarutigaa.

- KNI Polaroilip aaqqissuussaa kusanarpoq, maannamullu puukut amerlanerit tunisaniit utertinneqartalernerat takussutissaalluarpoq pinngortitami puukunik katersineq ingerlasoq, suliniutillu taamak ittut pisariaqartippagut, Josephine oqarpoq pinngortitamilu plastikkerpassuit eqqarneqartartut assigiinngitsutigut ajoqutaasut nassuiarlugu:

- Kalaallit Nunaanni plastikkinik sumut tamaanga eqqaaneq takussaasorujussuuvoq, imaani aamma takussaapput. Misissuinerpassuit takutippaat plastikki pinngortitami qanoq nungusarneqartarnersoq inuussutissanilu uiguleriiaani qanoq sunniuteqartartoq, assersuutigalugu uumasut inuillu nerisaannut ajoqutaasarluni. Pinngortitap saligaatsuutinnissaanut periusissaq pitsaanerpaaq tassaavoq eqqaavimmut igitsisarneq. Sumut tamaanga eqqaasoqarsimatillugu eqqakkat katersornissaat aqqutissatuaavoq, suliniutillu KNI-misut ittut peqqutaallutik plastikkinik eqqagassarpassuit eqqaavimmut - inissavimminnut - apuuttalerput puisip naavanuunngitsoq, Josephine nassuiaavoq.

Josephine Nymand Pinngortitaleriffimi biologiuvoq, Avatangiisinut aatsitassanullu immikkoortortami aqutsisuulluni.

Polaroilip puukunik utertitsisarnera ilinniartumit isumatusaarnertut aamma taaneqarpoq.

- Isumaqarpunga suliniut tamanna torrassuusoq, pinngortitamummi saligaatsuutitseqataammat taamaattumillu isumatusaartoqarluni, neriuppunga tamaangaannaq eqqaasarneq unitsinneqarumaartoq, pinngortitarmi paarisussaavarput, Ajaaja Silasen, Sisimiuni GUX-imi ilinniartoq isumaqarpoq. Ajaajap atuarnermini fagitut ingerlataasa ilagaat pinngortitaq avatangiisillu.

Ajaaja Silasenip tamaangaannaq eqqaasannginnissaq oqariartuutigaa.

Texacomeersunik puukunik utertitsisalerneq novembarimili aallartinneqarmat puukut 16.128-it katersorneqarsimalereerput, piffissamilu tassani tunisat 14.992-iullutik.

Pisiniarfiit 72-it aaqqissuussap aallartinneraniilli puukunik utertivigineqareerput.

KNI-p nunarput eqqiluitsuutikkumallugu allanik aamma iliuuseqartarpoq, soorlu ukiut tamaasa pisartoq KNI-mi sineriammi tamani sulisut eqqakkanik saliisarnerat.