Roberth Juliussen saqqarmiulerneqarpoq

Pingasunngornermi 18. november 2020 Upernavimmi Innuttaasut illuanni ikummatissaasiviup pisortaa Roberth Juliussen Ataqqinartorsuup Dronning Margrethe II-aata nersornaasiuttagaanik Fortjensmedalje-mik sølv-iusumik saqqarmiulerneqarpoq.

Nalliuttorsiorneq persuarsiorfiusoq KNI-mi pisortaaneq Peter Grønvold Samuelsen oqalugiarnermini ilaatigut ima oqarpoq:

“Tamassi tikilluaritsi.

Ullumikkut maani katersuuppugut suleqatitta Ataqqinartorsuarmit Dronningimit nersornaatisiassani tigussammagu.

Asasara Ruuba, Roberth Juliussen ilaquttatit suleqatitillu qamannga pisumik tikilluaritsi. Qularutiginngilara ilissinnut ilaquttassinnullu ulloq angisuujusoq, uagullumi KNI-mi suleqataasugut nalliuttorsiorpugut ulloq peqatigalusi malunnartikkusukkatsigu.

Ruuba ukiorpassuit matuma siornatigut KNI-mi, taamanikkut KGH-jusumi sulilersimavutit, aasaq mannalu 1. juni 2020 ukiuni 40-inngortorsiorlutit. 9. august 2020 maani tamanna malunnartinneqarpoq uppernarsaammik taamani Polaroil-imi driftschef-imit Gerth Jack Storer-mit tunineqarlutit.”

“1980-imi 1. juni 14-nik ukioqarlutit, 15-liingajalerlutit KGH-mi sulilersimavutit, maani Upernavimmi umiarsualivimmi. Umiarsualivimmi ukiut 22-it affarlu sulereerlutit 1. januar 2003-imi Polaroilip ikummatissaasiviani sulilersimavutit. Ukiut pingasut affarlu qaangiummata tankforvalterassistent-inngortinneqarputit. 15. maj 2011-imi tankforvalteritut, tassa maani Upernavimmi Ikummatissaasivilerisutut atorfinitsinneqarsimallutit. Taamanerniillu tassa atorfik taanna tigummiartuarlugu.”

Roberth saqqarmiulerneqareerami qujassuteqarluni ilaatigut ima oqaaseqarpoq:

“Qujanaq. Qujarusuppunga aggersinnaagassi ullormi pingaartorsiorninni. Ataqqinartorsuup saqqarmiuliuttagaanik saqqarmiulerneqarluni pilluarnassusia ullumikkut malugivara. Angajoqqaakka eqqaamavakka – ataatama meeraallunga oqarfigaanga ernumaginanga. 14-inik ukioqarlunga anaanama suliartoqquaanga, pissutsit taamani taamaapput, taamanili sulilersimavunga.“

Najuuttut nerinerminni Roberth inuummersoqqullugu erinarsoqatigiipput.

Saamerlermi takusinnaavarsi Roberthip nulia, Roberthillu talerpia tungaaniippoq paniat.

Ullorsiornermi nuannersumi Roberthip ilaqutai najuupput, Roberthip Polaroilimi suleqatai, Pilersuisumi sulisut aammalu Kiffartuussivimmiit angalaqatigiit.

Pisortaanerput Peter Grønvold Samuelsen oqalugiarnermini ima naggasiivoq:

“Ruuba, ilaquttatillu, pilluakutsooritsi, qujanarlu KNI-mi suliffimmi aalajaallutit ilumoorlutillu suli ulloq manna angullugu suliuarninnut. KNI-mi sullissineq, inuiaqatigiinnut nunaqqataasunullu tamanut sullissineruvoq pingaaruteqartoq.”