Qeqertarsuatsiaani puttasut inissipput

Tulattarfik, Polaroilip sissami orsersortarfiata nalaaniittoq, ukioq kingulleq aasami peerneqarpoq, taamaalilluni ikummatissanik tunisiviit orneriaannaajunnaarlutik. Polaroili angallateerarsortut pitsaasumik aqqutissaqarnissaat pingaartillugu puttasuliivoq.

Qeqertarsuatsiaani puttasut inissipput, innuttaasunut pingaartumillu umiatsiaararsortunut, nuannaarutaasumik.
- Nuannaajallannarpoq ingammik uagutsinnut, tassami orserniarutta puttasut pisariaqartippagut. Peqanngikkallarmat unamminarsimavoq, sivinganikkut ujarassuit aqqusaaqqaarlugit majuartarfikkut talikkiartortaraluaratta, Morten Johnsen, Qeqertarsuatsiaani aalisartoq, oqaluttuarpoq.

Polaroil 2010-mili Namminersorlutik Oqartussat tulattarfiata nalaani orsersortarfeqarnikuuvoq. Ukioq kingulleq paasissutissiissutigineqarpoq tulattarfik pisoqalivallaarluni peerneqartussanngortoq, Namminersorlutillu Oqartussat Qeqertarsuatsiaani marlunnik umiarsualiveqareerami tulattarfimmik nutaamik pilersitsiniarsimanngillat. Ikummatissaasiviullu orsertarfia nunaqarfiup tulattarfianut allamut nuunneqassappat aningaasartuutit amerlavallaassammata Polaroili allatut iliorpoq.

- Puttasuliinikkut angallateerarsortut pisariinnerusumik aqqutissiuussinnaavagut. Ikaartarfitoqqamik piiaasussat puttasuliortikkusunnikuugaluarpagut, taakkuli ulapputeqarlutik aggeriaannaasimanngillat, Polaroilimi pisortaq, Githa Brask Olsen, oqaluttuarpoq.

Pisut akornanni talittarfik peerneqarpoq, angallateerarsortullu Polaroilip ikummatissanut tunisivianut pitsaasumik aqqutissaarupput. Polaroili aalisartut taamatut atugassaqartikkusunnagit allatut iliuuseqarpoq. Nunaqarfiup sanasuata, Sanasoq Hansen ApS-ip, suliassaq tiguaa.

Suliarli naatsorsuutigisamiit suli sivisunerusumik ingerlavoq. Pilersuisup krameriisa puttasussat kivissinnaasimanngilai, Nuummiillu atortussanik ikiortissanillu utaqqisariaqartoqalersimavoq. Majuartarfiit utaqqiisaa atorneqartussatut ikkunneqarput. Kinguaattooqqittoqaqqipporli, ulappunneq silalu peqqutaallutik.
- Uanili sapaatip akunnerani puttasut ikkunneqarput atoriaannanngorlutillu, Githa Brask Olsen unnersiorpoq. Nangipporlu:

- Suliap ingerlarnga nunaqarfiup niuertuanut paasissutissiissutigisarparput, taassumalu innnuttaasut suliap killiffianik paasitittarpai, oqarpoq.

- Puttasut ikkunneqarneri ulluinnatsinnut malunniuteqaqaat, iluaallak, Morten naggasiivoq.

Puttasunut ikaartarfissaq suliarineqarmat.

Puttasut nutaat.

Tulattarfik pisoqalivissimasoq.