Qaanaami eqqaanilu tankeqarfiit nutarsarneqarput

Qaanaami tankeqarfik nutartereerluni.

Polaroilip Qaanaami Qaanaallu eqqaani tankeqarfiit ukioq manna nutarsarneqartussat naammassivai.

Polaroilip Qaanaami Qaanaallu eqqaani Savissivimmi, Siorapalummi Qeqertanilu tankit allallu nutarsagassat nutarsarlugit naammasseqqammerpai.

Qaanaami tankeqarfik nutarsangaatsiarneqarsimavoq, tassami tankeqarfiup benzinamik imarisinnaasaa 100 m3-mik allineqarnikuuvoq, ruujori imaarsaat taarserneqarpoq, tankeqarfiup biiliisa tunniussisarfiat nutaanngorpoq orsussamillu maqitsisarfiit automatimik tunniussisarfillit aamma ikkussuunneqarput.

- Orsussamik maqitsisarfiit pisoqaapput, nunattali avannaani atorluarsinnaallutik. Maqitsisarfiit nutaaliaanngillat atornissaalli pisariitsunnguullutik, aaqqitassaqarpat taarsigassaqarpalluunniit Polaroilimi sulisup nammineerluni isumageriaannaasarpai, Bjarne Lykkegaard, Polaroilimi sanaartugassanut pisortaq paasititsivoq.

Qaanaami tankeqarfik 2017-imi.

Nutarterinerit allat Savissivimmi, Siorapalummi Qeqertanilu ingerlanneqarput.

Savissivimmi nutartigassat pisariaqartut ingerlanneqarput; ataneqqortunissaat eqqarsaatigalugu nutarterinerit, tankip qaavanut aqqutissanik qulakkeerinninnerit kiisalu orsussamik maqitsiviit nutarsakkat ikkussuunneri.

Savissivimmi orsussamik maqitsivik.

Savissivimmi ikaartarfeeraq.


Savissivimmi 2017-imi ungaloq.

Ungaloq nutaaq.

Assinganik Siorapalummi pisariaqartumik nutarterinerit ataneqqortusaanerillu ingerlanneqarsimapput, tankit Kangerluarsorutsimi talittarfimmit atorunnaarnikumit qisuit atoqqillugit toqqaviliunneqarput orsussamillu maqitsiviit nutarsakkat ikkussuunneqarlutik.

Siorapaluk.

Polaroili Qeqertani orsussamaataateqarpoq, tamaanimi pilersuisussaatitaaneq aamma atuummat.

Siornatigut nappartanik 500-t missaanniittunik 200 liiterikkaanik orsussamaateqartoqaraluarpoq. Polaroilip Qaasuitsup Kommuniata avatangiisinut piumasaqaataa malittussaavaa, taamatullu aamma Nunatsinni TFB-mik peqqussutit (imerpalasunut ikuallajasunut teknikkikkut peqqussutit) malittussaallugit.

Qeqertami orsussap nappartaniitinnissaa naleqquttuunngitsoq paasinarsivoq, aningaasatigut, avatangiisitigut, ingerlatsinerup periusissiornerullu tungaatigut isigissagaanni nunaqarfimmi tankeqarfimmik pilersitsisoqarpat tulluunnerussammat, TFB-mi peqqussutit malinneqassappata.

Polaroilip tankit marluk nunaqarfik inuerunnikumit Moriusameersut atorlugit tankeqarfiliorpoq. Taassuma kingorna Nukissiorfiit Namminersorlutik Oqartussanit piumaffigineqarput Qeqertani innaallagissamik imermillu pilersuisussamik pilersitsissasut. Tamanna isumaqarpoq, Polaroilip 100 m3 uuliamut tankeq pilersittariaqassagaa.

Polaroili 100 m3-mik tankemik atornikumik toqqortaateqarpoq, Qeqertanilu orsussaq tankinut sisamanut agguarlugu ullumikkut inissinneqarnikuuvoq.

Qeqertani tankeqarfik.