Polaroilip plastikkinik puukunik utertitsisitsisalernera iluatsittoq

Qeqertarsuarmi Polaroilimi sulisut utertitanik perrassaatinut puukuuserlutik.

Perrassaatit Texaco-meersut puukui siornali novemberimiit Polaroilimut Pilersuisumullu utertinneqarsinnaalernikuupput, suliniullu taanna plastikkit pinngortitamiittut ikilisaaqa taaffiginiarlugu KNI-p suliniutaasa ilagaat. Dunkit imaqanngitsut utertinneqartartut suli amerliartuinnavipput.

KNI-p suliniutaasa ilaat 'KNI qorsuunerusoq' tassaavoq motoorinut uuliat perrassaatit Polaroilimi Pilersuisumilu pisiarineqarsimasut utertinneqarsinnaalernerat. Suliniut maannakkut qaammatini arfineq marlunni ingerlasimalereerpoq, dunkillu imaqanngitsut utertinneqartartut qaammatit tamaasa amerligaluttuinnarput.

- Perrassaatit dunkitaannik utertittakkat tigusakkagut amerligaluttuinnarput. Tamanna assut nuannerpoq tusarluarnarlunilu, tassami pinngortitap eqqiluitsuutinneqarnissaa tamanut iluaqutaasussaavoq, Polaroilip pisortaa, Githa Brask Olsen, oqarpoq.

Siorna novemberimiit ullumimut Texaco dunket 5.458-it utertinneqarnikuupput, nunarpullu tamakkerlugu tunisat affai sinnerlugit utertinneqarnikuullutik.

- Texaco dunkit imaqanngitsut sumiiffinni 69-ini tigooqqarnikuuagut. Tassa sumiiffinni utertitsivigineqarsinnaasuni tamarluinnarni. Naak utertitsisinnaaneq ukiorluinnartoq aallartikkaluarlutigu assut angusarissaarpugut, qularnanngilarlu dunkit ilai suli apummiissasut, Githa Brask Olsen ilisimatitsivoq.

Utertitsisinnaaneq periarfissanngormat KNI siorna tusagassiutitigut nalunaaruteqarmat pisortaaneq ilaatigut oqarpoq:
- Nunarput pinnersoq issittumilu pinngortitaq immikkuullarissoq tulluusimaarutigaavut – taamaattumik aamma pinngortitap innarlitsaalineqarnerani immitsinnut pisussaatittariaqarpugut.  Taamaattumik siunissaq qorsuunerusoq anguniarlugu ulluinnarni inuunitsinni piujuaannartitsinissamik atoqqiinermillu eqqarsartariaaseqarnerulertariaqarpugut.  KNI-mut atatillugu piffissamut nutaamut ikaarsaariarpugut, niuernermik ingerlataqarnitsinni avatangiisit innarlitsaaliorneqarnissaannik eqqarsarnerulernissatsinnut. Pisisartugut avatangiisinut innarlitsaaliueqataanissaannut periarfissarinnerulersikkusuppagut.

Suliniut ingerlassaaq

Pinngortitap siunissami minguinnerunissaanut utertitsisarneq aningaasaliilluarneruvoq, sulilu amerlanerit utertitsisalernissaat suliniutigineqarpoq.

- Suliuterput suli nittarsaattuassavarput. Allagartarsuarnik ikummatissaasivinni Pilersuisullu pisiniarfiini tamani nivinngartuinitta saniatigut uuliaarniartut namminersortut aamma aperinikuuagut utertitsisinnaaneq pillugu allagartamik nivinngaanermikkut nittarsaaqataasinnaanersut. Pisisartut Polaroilimi Pilersuisumilu perrassaatinik pisiaqartillugit puukuinik utertitsisinnaasut aamma oqarfigineqartarput.

Qanoq iliornissamik ilitsersuutit puussallu uuliatalinnut poorineqarsinnaasut tiguneqareerpata puukut utertitat siunissami qaninnermi ikuallanneqartussanngorlugit nassiunneqassapput.

Dunkit perrassaatit puukui avatangiisimik mianerinnillutik ikuallaaviusunut ikuallatassanngorlugit qanittumi nassiunneqassapput.

Nassiussinermi karsinut naleqquttunik puussiartalerlugit palitsinut ataasiartakkanut atoqqitanut iliorarlugit nassiunneqassapput.

Texaco dunkit utertinneqarsinnaasut tassaapput Texaco motoruuliat gearuuliallu Pilersuisumi Polaroilimilu pisiaasimasut puukui. Dunki ataaseq utertikkaanni 3 kr.-innassutigineqassaaq, kisianni Polaroilimi Pilersuisumilu perrassaatinik Texaconik pisigaanni puui qaavatigut akeqanngillat.

Perrassaatit dunkitai allat aamma utertinneqarsinnaapput, taakkuli aningaasanik naleqassanngillat.

Polaroilip pisortaa Githa Brask gearuuliap puukuinik Sisimiuni Polaroilip ikummatissaasiviani ikiortimut Jafet vid Steinimut utertitsisoq.