Polaroil uuliamik oqimaatsumik tunisaqarpoq

Pingasunngornermi 28. november 2018 Polaroil siullermeerluni uuliamik oqimaattumik (HFO) orsiivoq nunamiit. Tamanna pivoq kilisaat Acadienne Gale II (Markus-iusimasoq) Nuummi umiarsua-livimmi orsersorneqarmat.

Piffissami kingullermi, ingammik Nuummi Sisimiunilu inuit arlallit maluginiarsimassavaat kalittagarsuit assakaasullit ikummatissamik usisinnaasut takisuut, tungutsoriit Polaroil-ip ilisarnaataanik ilisarnaatillit.

Tassaaku taakku kalittakkat ikummatissamik usisinnaasut sisamat Polaroil-ip sanatissimagai, marluk Nuummiittussanngorlugit marlullu Sisimiuniittussanngorlugit, tassalu uuliamik oqimaatsumik umiarsuarnik orsersuisarnissami atugassanik. Manna tikillugu taamaallaat Oratank uuliamik oqimaatsumik orsersuisinnaanikuuvoq.

2010-mi Polaroil uuliamik oqimaatsumik orsersuisinnaanngornikuuvoq, ingammik kalaallit kilisaataataat anginerit eqqarsaatigalugit. Suliassaq taama ittoq kivissinnaajumallugu taamanikkut Oratank allanngortiterneqarpoq, uuliamik oqimaatsumik sanaartorsinnaalersillugu. Uulia oqimaatsoq Islandimut Oratank-ip aasarpaa, apeqqutaallunilu umiarsuaq ikummatissamik oqimaatsumik IFO 380, 180 imaluunniit 30-mik piserusunnersoq, taava Oratank-ip orsersuinermini uulia oqimaattoq gasolie-mik naliginnaasumik akoortarpaa imerpallatsissinnaallugu.

Umiarsuit angisuut kilisaatillu motoritik atortulertarpaat ikummatissamik oqimaatsumik ingerlateqarsinnaalersillugit. Uulia oqimaatsoq gasolie-mik naliginnaasumit akikinneruvoq, taamaattumillu piumaneqarluartarluni.

Sooq Polaroil uuliamik oqimaatsumik nunamiit orsersuerusunnerua imaani pinnani?

Avatangiisit illersorneqarnissaat eqqarsaatigalugu nunamiit tunisineq imaani orsersuinermut sanilliullugu isumannaanneruvoq.

Aappaatut pissutaavoq, tamannalu Polaroil-imut pissutaaneruvoq, tassalu Orasila Oratank-ilu marluutillugit ukioq iluitsoq attartorneqartarneri akisummata, nunamiillu orsersuisalernerup malitsigissammagu Oratank ukioq tamakkerlugu atornagu, kisianni soorlu qaammatini 3-4-ni atorlugu (siornatigut taamaannikuuvoq) aningaasarpassuit sipaarneqarsinnaammata.

Tassalu tamanna pissutigalugu Nuummi Sisimiunilu ikummatissaasivissuit marluk nutarterneqarneqarput kalittagarsuillu sisamat pisiarineqarlutik, aningaasanik sipaartoqarsinnaammat.

Uulia oqimaatsoq kissassimaartinneqartussaavoq, nillertumiikkuni issortarami qerattarluni sullulikkoortinniarneqarnissaalu ajornakusoorsisinnaasarluni. Taamaattumik-una Nuummi Sisimiunilu ikummatissaasivissuit marluk oqorsarneqartut, nutaamik natilerneqarlutik, kiassaaserneqarlutik, akoorissuserneqarlutik, kiisalu kalittagarsuit sisamat pisiarineqarlutik, umiarsuarnik orsersuinermi atorneqarsinnaalersillugit.

Kalittagarsuarmi ikummatissaasivik ataaseq 37 m3-imik imaqarsinnaavoq. Kilisaat Nuummi ullumikkut 200 m3-mik orsersorneqarpoq, taamaattumillu kalittagarsuit marluusut tamarmik pingasoriarlutik immeriartoqqinneqartarput.

Nuummi Sisimiunilu Polaroil-ip sulisui Danmarkimi akoorummik nioqquteqartumut pikkorisariarnikuupput.

Pikkorissariarfianniit aamma Nuummut Sisimiunullu Polaroil-ip sulisuinik pikkorissaajartortoqarnikuuvoq.

Nuummi Sisimiunilu kalittagarsuit atorneqarnissaannik ilinniartitsiartornikuupput kalittagarsuarnik taamaattunik atuinermik misilittagaqarluartut Danmarkimeersut.