Ikummatissamik atuinerulerneq nunaqarfinni ikummatissap uninngasuutigineqartup annertusarneranik kinguneqarpoq

Tasiusami (UPV) orsertarfik.

Ukiuni kingullerni tallimani sumiiffinni arlalinni ikummatissamik atuineq annertusiartorsimavoq, tamannalu Polaroilip nunaqarfinni ikummatissap uninngasuutimi annertusaaneranik kinguneqarpoq.

Naleqqussartoqartuaannartariaqarpoq.

Ukiuni kingullerni nunatsinni ingammik benzinamik atuineq annerulersimavoq, taamaattumillu Polaroilip nunaqarfinni ikummatissamik uninngasuutini annertusartariaqarsimavaa.

- Fabrikkinik nutaanik sanaartortoqarpoq. Aalisartoqarnerutillugu tunisisoqarnerusarpoq, tamannalu fabrikkit innaallagiamik atuinerulernerannik kinguneqartarpoq. Umiatsiaararsortut aquuteralaat sakkortusinikuupput, avannaanilu piniartut aalisarnerulernikuullutik, ingammik Uummannap, Upernaviup Qaanaallu eqqaani. Taakku peqqutaallutik ikummatissamik uninngaasutigut annertusartariaqarnikuuagut, Bjarne Lykkegaard, Polaroilimi sanaartornermi pisortaq paasititsivoq.

Upernavik Kujallermi Tasiusamilu (UPV) ikummatissamik uninngasuutigineqartoq ukioq manna oktoberimi annertusineqarpoq, taamatullu Ukkusissani Ikerasammilu annertusaanerit aappaagu naammassineqassapput.

Upernavik Kujallermi ikummatissap uninngasuutigineqartup annertusarnera tankit atornikunit marlunnit pivoq.

Nammineerluni orsertarfiit pitsanngorsarneri peqqutaallutik orsertarneq ajornannginnerulernikuuvoq, tamannalu orsussamik pisiniarnerulersitsivoq. 

- Sumiiffimmi aalajangersimasumi nammineerluni orsertarfittaartoqartillugu sullissineq patajaallisarpoq, inuillu nunaqarfiit eqqaanneersut orseriartortalersarput, Bjarne Lykkegaard oqarpoq.

Saqqami Saattunilu benziinamut uninngasuutigineqartoq aamma annertusarneqarnikuuvoq.

Ukiuni tulliuttuni nunaqarfiit ilaanni ikummatissap uninngasuutigineqartup allineqarnissaa aamma pisariaqalerumaarpoq.

Saqqami ikummatissap uninngasuutigineqartup annertusarnera

Saqqami ikummatissap uninngasuutigineqartup annertusarnera