Ikummatissat eqqussorneqarnerini assartuinermi nutaamik isumaqatigiissusiorneq

KNI A/S, Polaroil umiarsuit pillugit isumaqatigiissitsiniartartoq Maersk Broker, København ikiorsiullugu ukiuni tallimani atuuttussamik tyskit umiarsuaatileqatigiiffiat German Tanker Shipping-imut isumaqatigiissusiorpoq, taakkulu Polaroil-ip ikummatissamik avataaniit tikisitaanik assartuisuussapput. Ikummatissaq assartorneqartussaq suli Gøteborg-imi akuiaavimmiit Preem-imiit usilersuunneqartassaaq, taamaalilluni Polaroil-ip ikummatissamik avataaniit tikisitaa Kangerluarsorutsimi, Nuummi Sisimiunilu ikummatissaasivinnut usingiarneqartassaaq, kiisalu ukiumut ataasiarluni Kangerlussuarmut ikummatissamik pajuttassallutik.

Ikummatissap assartorneqartussap annertussuseraa 1.000.000 kubikmeter, uuliamillu nioqqutissiat pineqarput gasuulia, petroleum, timmisartup orsussaa Jet A1 benzinalu. Ikummatissamik avataaniit tikisitsisarnissami apriilimiit decembarimut ukiumut tallimariarluni assartuinermi tikisinneqartartussaavoq 40.000 kubikmeter.

Siullermeerlutik Nunatsinnut assartuinerminni Nuuk ull. 19. april pajuffigaat, usimi affaata missaa usingiariarlugu sinnera Kangerluarsorutsimukaatissavaa.

German Tanker Shipping ilaqutariit umiarsuaatileqatigiiffigaat tusaamaneqarluartoq Bremen-imeersoq, taakkulu immani sikulinni uuliamik assartuinermi immikkut ingerlataqartuupput. Umiarsuaataat tamarmik sikusiuutaapput. Umiarsuaataat marluk Nunatsinni assartuisussat sikusiutissatut qajanaannerpaatut suliaapput immikkullu atortulersugaallutik, taamaattumik issittumi piumasaqaatit ull. 1. januaarimi atuutilersunut eqquutsitsinneqarlutik.

Umiarsuit German Tanker Shipping-ip assartuitinniagai ateqarput m.t. "Seacod" aamma m.t. "Seamarlin". Umiarsuit ikummatissamik assartuutit assigiimmik sanaajupput tyskillu Kiel-imi amutsivianni Lindenau-mi sanaajullutillu tunniunneqarput, aappaa 2006-imi aappaalu 2007-imi. Umiarsuit tamarmik immikkut 40.600 ton usisinnaavaat.

Inussiarnersumik inuulluaqqusillunga

Tage Lindegaard
Energidirektør, Polaroil
Email: tal@kni.gl