Umiarsuaq Qaanaap ukioq kaajallallugu atortagaata affaatut annertutigisumik orsertoq

Umiarsuaq takornariartaat Crystal Serenity, 250 meterisut takitigisoq, 1000-it sinnerlugit ilaasoqarluni sikut pissutigalugit siornatigut aqqutigiuminaatsukkut Nordvestpassagekkut ingerlareerluni Sisimiunut tikippoq 8. september. Umiarsuaq una sikusiummik Ernest Shackletonimik ingiallorneqarpoq aqqutaani sikusiulissappat ikiuisussamik. 

Ulloq taanna Sisimiuneereerlutik unnukkiartornerani kujammut taakku aallarput. Ornitaat tassa Nuuk. Umiarsuaq takornariartaat tassani orsissaaq, suliassamillu tassannga isumaginnittussaavoq Polaroil. Orsiisoqarnissaanik noqqaassutiginnittuuvoq Malik Supply A/S.

Orsiineq taamaattoq umiarsualivimmi ruujoritigoortumik pisaraluarpoq piffissaliunneqartulli sivikitsup iluani ikummatissaq imerpalasoq noqqaassutigineqartoq taama annertutigisoq tassuunakkut nuunneqarsinnaanngilaq. Suliassamillu isumaginnittussanngorpoq Oratank.

Ikummatissarmi imerpalasoq nuunneqartussaq annikitsuunngilaq. 964.000 liter gasolie – Qaanaami kiassarnermut ukiumut atorneqartartup affaa – tiimialuit ingerlaneranni umiarsuup ikummatissaasiviinut nuunneqarput.

Polaroilip pisortaa Tage Lindegaard suliap naammassinerani iluarisimaarinnippoq:
- Suliakkiissutigineqartoq una suliassanut annertuunut ilaavoq, atortulli eqqortut sulisullu suliaminnik naammassinninnissamut ajukkunnanngitsut pigigatsigit piumaneqartoq piffissaq eqqorlugu tunniupparput suliarlu naammassillugu. 


Ass. Ulrik Bang

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl