1. april 2017 Ikummatissap akia apparneqarpoq

Ikummatissap akia literimut 20 øre-mik apparneqarpoq. Akit nutaat 1. april 2017 atuutilissapput. Taamaalilluni gasolie, petroliu aamma benzina literimut 20 øre-mik akikillissapput.

Polaroil-ip akigititai 1. april 2017-imiit imaalissapput:

• Gasolie/diesel: literimut 5,75 kr-imiit 5,55 kr.-imut appartinneqarpoq avatangiisinut akitsuut literimut 10 øre-usoq ilanngullugu.
• Petroleum: literimut 5,86 kr.-imiit 5,66 kr.-imut appartinneqarpoq avatangiisinut akitsuut literimut 10 øre-usoq ilanngullugu.
• Benzin: literimut 5,60 kr.-imiit 5,40 kr.-imut appartinneqarpoq avatangiisinut akitsuut literimut 10 øreusoq ilanngullugu.

Taamatuttaaq Jet A-1 (timmisartup orsussaa) literimut 20 øre-mik akikillissaaq, 5,78 kr.-imiit 5,58 kr.-imut.

Akikilliliineq una september 2014-ip kingorna, nunarsuarmi ikummatissap akiata appariartulerneraniit, akinik appaanerit tallimassaraat. Ikummatissap akia 2014-imi aasaaneranit taamaalilluni literimut 1,10 kr.-nik akikinnerulerpoq, tamannalu ukiumut 135 mio. kr.-init missaanni atuisartunut oqilisaassissaaq.

Taamaalilluni ikummatissat akii ukiut arfinillit matuma siornatigutulli ilerput.

Ikummatissat imerpalasut akiisa ineriartornerat

Akinik appaanermut pissutaanerpaapput 2017-imi ikummatissarsiniarnissami akit qulakkeerneqarsimasut appasinnerunerat amerikarmiullu aningaasaata naliganik qulakkeerinnissutit akikinnerunerannit.

Takussutissiamut matuma ataaniittumut atatillugu oqaatigineqassaaq, Polaroil-ip ikummatissaq tunisartagaa annikilliartormat, maanna ukiumut 125 mio. literip missaaniilersimalluni. Tamanna 2009-imi ikummatissamut tunineqartartup 75 %-iinnerivaa. Ikummatissamik atuinikinnerulerneq pissuteqarpoq erngup nukiganik innaallagissiorfiit atorneqarnerulersimanerinit, kiisalu illut oqorsaasersorneqarnermikkut oqornerulersimanerannit, aammalu kiassaatit motoorillu allat nutaaliaanerusut orsussamik atuinikinnerusut atorneqarnerulersimanerinit.

Ikummatissaq tunineqartoq annikillisimagaluartoq, taamaattoq aningaasartuutit aalajangersimasut appartinneqaannarsinnaanngillat, ikummatissaasiviit ikilineqanngippata, taamaalilluni literimut agguaqatigiissitsinermi aningaasartuutit 45 øre-mik qaffasinnerulersimapput, kiisalu aamma ataani takussutissiamut atatillugu erseqqissarneqassaaq ikummatissap Nunatsinni tuniniarneqarnera Danmarkimut sanilliullugu aningaasartuuteqarnarnerummat.

Inussiarnersumik
Tage Lindegaard Energidirektør Email: tal@kni.gl

Polaroil

Namminersorlutik Oqartussat KNI A/S-illu akornanni kiffartuussinissamik isumaqatigiissut naapertorlugu ikummatissamik imerpalasumik Nunatsinni Polaroil pilersuisussaatitaavoq. Isumaqatigiissummi aalajangersarneqarsimavoq Polaroil ikummatissamik tuniniaanermini qanoq atsigisumik iluanaaruteqarsinnaatitaanersoq. Kalaallit Nunaanni ikummatissaq literimut qanoq akeqassanersoq makkunannga toqqammaveqarluni aalajangersarneqartarpoq: Nunarsuarmi uuliap akuiarneqanngitsup akia, uuliamik akuiaavinni akit, amerikkarmiut aningaasaata dollarip nalinga, umiarsuarmik Nunatsinnukaannera, sillimmasiineq, Nunatsinni inoqarfinnut assartuineq, ingerlatsinermi aserfallatsaaliuinermilu aningaasartuutit.