Ikummatissap akia apparneqarpoq

Ikummatissap akia literimut 27 øre-mik apparneqarpoq. Akit nutaat 5. januar 2016 atuutilissapput.

Polaroil-ip akigititai 5. januar 2016-imiit imaalissapput:

• Gasolie/diesel: literimut 6,20 kr-imiit 5,93 kr.-imut appartinneqarpoq avatangiisinut akitsuut literimut 10 øre-usoq ilanngullugu.
• Petroleum: literimut 6,31 kr.-imiit 6,04 kr.-imut appartinneqarpoq avatangiisinut akitsuut literimut 10 øre-usoq ilanngullugu.
• Benzin: literimut 6,05 kr.-imiit 5,78 kr.-imut appartinneqarpoq avatangiisinut akitsuut literimut 10 øreusoq ilanngullugu.

Akinik appaaneq inuiaqatigiinni inoqutigiinnut ataatsimut isigalugu 2016-imi 34 mio. kr.-nik aningaasartuutikillisaataassaaq.

Ukiut siuliini periuseq naapertorlugu KNI A/S Polaroil ikummatissaq 2016-imi pisiassami akii aalajan-gersimasumik isumaqatigiissuteqarnikkut qulakkeereersimavai; tamannalu aningaaserivissuit arlariiaat suleqatiginerisigut pisarpoq. Akitigut isumaqatigiissutit 2016-imi ukiup siulianut sanilliullugit appasinnerummata, Polaroilip ikummatissanut akigititai appartinneqarsinnaalerput.

2014-ip ukiaata kingorna taamaalillutik akit pingajussaa appartinneqarput, katillugit literimut 72 ørenik.

2016-imi ikummatissanik Nunatsinnut eqqussuineq ukiut kingulliit marluk pisimanerattulli tallimariarluni piumaarpoq. Ikummatissaq Nunatsinnut eqqunneqartartoq kiffartuussisussaatitaanerup iluani atorneqartartoq annikilliartorpoq, maannakkut 125 mio. liter missaaniilluni, imaluunniit 2009-imi eqqunneqarsimasup 75 %-ia.

Inussiarnersumik inuulluaqqusillunga

Tage Lindegaard

Pisortaq Polaroil
Email: tal@kni.gl

Polaroil pillugu

Namminersorlutik Oqartussat Polaroilillu akornanni kiffartuussinissamik isumaqatigiissut tunngavigalugu ikummatissanik imerpalasunik Polaroilip nunarput tamaat pilersortussaavaa.  Uuliamik niuernermini Polaroilip qanoq isertitaqarsinnaatiginera kiffartuussinissamik isumaqatigiissummi aalajangersarneqarpoq. Nunatsinni atuisunut akigitinneqartoq assigiinngitsunik tunngaveqartinneqarluni aalajangiiffigineqartarpoq, akit qanoq inissisimanerannut aalajangiisuusarluni nunarsuarmi tamarmi uuliap akuiarneqanngitsup akia, uuliamik akuiaalluni nioqqusiornermi aningaasartuutit, amerikamiut dollariata nalinga, uuliamik eqqussukkamik assartuineq sinerissamullu apuussorneqarnerani assartuineq kiisalu tankeqarfinni ingerlatsinermi aserfallatsaaliinermilu aningaasartuutit.