Qaanaami tamakkiisumik nutarterineq

2005-imiit Polaroilip Kalaallit Nunaanni ikummatissaasivimminik tamakkiisumik nutarterisarnini aallartippaa.

Tamakkiisumik nutarterisarnerni siunertaapput:

• Ikummatissaasiviit sivisunerusumik piusinnaanerisa qularnaarnissaat
• Ikummatissaasivinnut ikummatissanik pajuttuinerup pitsaasuutittuarnissaa
• Ikummatissaasivinni sillimaniarnikkut avatangiisitigullu pissutsit pitsanngorsarnissai
• Ikummatissaasivinnut piumasaqaatit nutaanerpaat naapertorlugit nutarterinissaq

2015-ip aasaa aallarnerfigalugu Qaanaami ikummatissaasivik tamakkiisumik nutarterneqalissaaq. Taamaasillutik nutarterinermik suliaqartartut suleqatigiit ataatsit Kalaallit Nunaanni avannarpasinnerpaamut nuunneqassapput.

Qaanaami tamakkiisumik nutarterinissaq sumiiffinnut allanut nutarteriffiusartunut naleqqiullugu pilersaarusiornermik annertunerusumik pisariaqarfiuvoq. Sumiiffik aasallu naatsunnguusarnera pissutigalugit pilersaarusiorneq annertunerusoq pisariaqarpoq.

Ikummatissaasivik anginngikkaluarluni nutarterneqarnissaalu ikummatissaasivinnut allanut naleqqiullugu annertoorsuunngikkaluartoq, inissisimaffiata ukiumullu marloriaannarluni pajuttaammik tikinneqartarnerata, atortussanik assigisaanillu assartuinissap siumungaaq pilersaarusiorluarneqarnissaa pisariaqartuutippaat.

Nunap qerisup silallu piffissami sivisuumi nillertarnerata nunamik tankinillu suliaqarnissaq aasaanerinnaani pisinnaatippaat. Taamaasilluni ikummatissaasivik aasat pingasut atorlugit suliarineqassaaq, naak illoqarfinni ikummatissaasiviit nalinginnaasumik ukiuni marlunni suliarineqartaraluartut.

Tamakkiisumik nutarterinermi suliassaapput:

• Benziinamut tanki 100 m3-mik imaqqortussusilimmik aapperneqassaaq. Tankip ilaa nunap iluanut assaanneqassaaq ilaalu qallerneqassalluni
• Tankit napasut sioqqat imerlu atorlugit (sandblæsning) qalipaataajarneqassapput qalipanneqarlutillu
• Tankit qaavini pisuffiit taarserneqassapput
• Ikummatissanik tunisiviit (standerit) taarserneqassapput
• Ruujorit ikummatissaasivimmiittut taarserneqassapput inissinnerilu allanngortinneqassallutik taamatuttaarlu ruujorit immiiviit taarserneqassapput