1. decembari 2014-imiit ikummatissat akikillissapput

Gasoliap, Petroleup Benzinallu akii 24 øremik akikillissapput.

Ikummatissarsinermi akiliutaasup amerikamiut dollariata nalinga ukiormanna aggustimi ikummatissap akinganik qaffaanermi tunngavigineqartoq ilimagisamit maannamut appasinnerusimavoq. Tamatuma saniatigut ingerlatsinermi sulisoqarnermilu aningaasartuutit ataatsimut isigalugu sipaarfiusimapput, kiisalu atortuutinik attartortitsinermi naatsorsuutigissatinnit isertitaqarnerusimalluta.

Polaroil-ip akigititai 1. decembari 2014-imiit imaalissapput:

• Gasolie/diesel: Literimut 6,65 kr.-imiit 6,41 kr.-imut, avatangiisinut akitsuut literimut 10 øreusoq ilanngullugu.
• Petroleum: Literimut 6,76 kr.-imiit 6,52 kr.-imut , avatangiisinut akitsuut literimut 10 øreusoq ilanngullugu.
• Benzin: Literimut 6,50 kr.-imiit 6,26 kr.-imut, avatangiisinut akitsuut literimut 10 øreusoq ilanngullugu.

Ikummatissaq ukioq manna avataaniit tikisinneqartussaq nunatsinnut apuunneqarsimalereerpoq, tikiussassaq kingulleq novembarimi nunatsinnut apuunneqarluni. KNI A/S Polaroil-ip naatsorsuutigaa avataaniit tikiussinissat tulliit upernaaru apriilimiit aallarteqqissasut.

Aalajangersimasumik akeqartitsinissamik isumaqatigiissutit

Nunatsinni maanna akinik appaaneq Juni 2014-p kingorna uuliap akuigassap uuliallu akuiarneqarnerani nunarsumi akit apparsimanerannik tunngaveqanngilaq.

Siusinnerusukkut nalunaarutigeriikkatsitut uuliamik akuiagassamik uuliamillu akuiarneqareersumik 2014-mi pisinitsinni aalajangersimasumik akiliinissaminik KNI A/S Polaroil isumaqatigiissuteqarpoq. Isumaqatigiissutit taakku niuerfinnut aningaaserivinnullu assigiinngitsunut pisinermi attavigineqartartunut isumaqatigiissutaapput.

Aalajangersimasumik akeqartitsinissamik isumaqatigiissuteqartarnivut piffissami 2008-2013 inuiaqatigiinnut katillugit 197 mio. koruuninik sipaarutaapput. 2009 immikkut isigissagaanni aalajangersimasumik akeqartitsinissami isumaqatigiissut nunarsuarmi akiusunit qaffasinnerusimavoq. 2014-mi aamma taamaassaaq nunarsuarmi tamarmi ikummatissat akiisa appariarnerat pissutigerpiarlugu. Piffissaq 2008-2014 eqqarsaatigalugu naatsorsuutigaarput inuiaqatigiinnut sipaarutaasut 185 mio. kr.-it missaanniissasut.

PAASISSUTISSAQ: