Issittumi ikiueqqaarneq ikuallatsaaliuinerlu

Polaroilip sinerissami ikummatissaasiviini sulisut 14-t Nuummi Qatserisarfik suleqatigalugu iluatsilluartumik pikkorissarneqaqqammerput.

polaroil-kursus-DSCN4079.jpg

Polaroilip ikummatissaasivii taamaattuunertik pissutigalugu immap killinganut qanittumi inissisimagajunnerupput, illoqarfiit avataanniikkajuttarlutik inuillu najugaannut ungasittumiikkajuttarlutik.

Tage Lindegaard, pisortaagallartoq, Polaroil:
- Orsussamik ikummatissamillu pilersuisuunerput pissutigalugu sillimaniarneq uatsinnut pingaarnerpaajuvoq. Ikummatissaasivinni tamani sillimaniarneq annertuumik isiginiartarparput, taamaakkaluartorli piareersimaffigisassaraarput ajutoortoqarsinnaanera. Taamaattumik pingaaruteqarluinnarpoq suleqatitta ajutoortoqassagaluarpat ikiueqqaarsinnaanissaat pingaartumillu ikuallatsaaliuinermik isumaginnissinnaanissaat.

Sulisut suliaat najoqqutassani marluusuni sukumiisumik allassimapput. Aappaani sammineqarpoq ikummatissaasiviit qanoq sanaajunersut qanorlu aqunneqassanersut, aappaanilu allassimalluni sulisut sulinerminni suna najoqqutarissaneraat.

Tage Lindegaard:
- Ikummatissaasiviit illoqarfinni nunaqarfinnilu 69-niipput 70-nillu sulisoqarpugut. Inuiaqatigiit pisariaqartilluinnartuuaatigut, suliffeqarfittullu qulakkiissavarput aqqutissiuullugulu ikummatissamik tamanut pilersuisussaatitaanerput pillugu sulisutta eqqortunik piginnaasaqarnissaat ilisimasaqarnissaallu. Tamatumunnga ilaaginnarpoq issittumi ikiueqqaarneq ikuallatsaaliuinerlu pillugit pikkorissaaneq, pikkorissaanerillu allat aamma ingerlattuarumaarpagut.

Ineriartortitsinermut siunnersorti, Mikol Heilmann, sulinermut inunnullu ataasiakkaanut tunngatillugu pikkorissaanernik tamanik Polaroilimi pilersaarusiorlunilu aaqqissuisartoq Nuummi Qatserisartut peqatigalugit pikkorissaanermut aammalu pikkorissartut tunniusimanerannut annertuumik iluarisimaarinnippoq.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl