Ataqqinartorsuup Dronningip nersornaasiuttagaanik sølviusumik Upernaviup eqqaani Aappilattumi saqqarmiuliineq

Arfininngornermi 2. april 2016 Upernaviup eqqaani Aappilattumi niuertoq Simon Petersen ukiuni 40-ni KGH-mi/KNI-mi sulisimanerani Ataqqinartorsuup Dronning Margrethe-p nersornaasiuttagaanik saqqarmiulerneqarpoq. 

Nersornaasiineq allaaqqissuup ataani seqinnareqisoq atuarfimmi ingerlanneqarpoq. Ulloq persuarsiornartoq Simon Petersenip ilaqutai, Aappilattumi niueqatigisartagai Pilersuisumilu suleqatai peqatigalugit nalliussineqarpoq.

Saqqarmiuliisoqareermat”Sinniisiga  asassavakkit” aamma ”Pavunga qaqqamut” atorneqarpoq. Pilersuisup pisortaa, Finn Fabrisius, tuniniaanermi pisortaq Ole Løvstrøm Pilersuisoq Upernavimmilu pisiniarfiup pisortaa Erik Emmanuelsen saqqarmiuliinermut atatillugu Aappilattuliarput.

PDF_inngorlugu tamaat.

Pilersuisup pisortaa Finn Fabricius oqalugiarami ilaatigut ima oqarpoq:

“Asasara Simon,

31. januar 1976-imiilli KGH-mi/KNI-mi sulilersimavutit, sulisaleqqaaravit laajatut sulisaleqqaasimallutit, nammineq oqarnittuut “nukappiaraatitut”, taamanikkut Ulrik Jørgensen niuertorusiusoq. Aasakkut KGH-mi sulisarsimavutit, tassa qeqaravilli sulisalersimavutit, ilaatigut ukiukkut imissaqarniarnermi kommunimi nilattartuusarsimallutit.

Meeqqat atuarfianni atuarunnaaravit ilinniariartorsimanngilatit, taamanikkut atuartut Danmark-imut atuariartortinneqartarmata piukkunneqarsimagaluarlutit aallarsimanngilatit anaanavit aallaqqusimanngimmatit – immaqa qimallugisimassavaatit.

Ukiorpassuarni sulininni eqqaamasarpassuaqarlutillu misigisarpassuaqarsimavutit, nuannersullu ilaannik perlasisimanerarlutit ima oqaluttuupparma:

Pisiniarfimmi sulillutit – inuusunnersaagavinngooq – ullaat tamaasa suliassaqartinneqartarsimavutit – tassalu ullaat tamaasa aappalaartoq amusartussaasimavat. Nuannisaarsimareerlutit sinillarlutit ullaakkut iteriataaravit taavaana qulaaluanngortoq. Pisiniarfimmukapallariarlutit aappalaartoq amusinnarlugu pisiniarfimmut iserniaraluaravit manngaallak parnaaqqasoorlutit. Utaqqigaluaravit utaqqigaluaravit allanik takkuttoqanngilaq. Allaat iterialloortarsi takkussimanngitsorluunniit. Qulinngullartoq silassannik silasilerlutit aappalaartoq amusaraluit piipallak – tassami ullaakkuunngitosq unnukkulli itersimavutit.

Aappilattumi angusarissaartarsimavusi ilaatigut nunaqarfitsialattut toqqarneqarsimallusi. Angusarissaartarassi 1999-imi aperineqarsimavutit niuertut ilinniartitaanerannut taamanikkut aallartinneqartumut ilinniartunngorusunnginnersutit, akuerseriaravillu 2001-imi niuertutut naammassiniariutaa niuertunngortinneqarsimavutit ullorlu manna tikillugu niuertuullutit.

Suleqatigiinneq, tunniusimaneq qiimanerlu pingaartitaralugit suliffiit nuannarisuuat. Sulisunnit niuertoqatinnillu ataqqineqartuuvutit pitsaasuinnarmillu isummersimasuullutit.

KNI A/S Pilersuisoq sinnerlugu KGH-mi/KNI-mi ukiorpassuarni sulisimaninnut qutsavigiumavakkit. Ilaquttatit tamaasa aamma qutsavigiumavakka. Ilaquttavit ukiorpassuarni tapersersortuartarsimassagaatsit qularinngilara.

Naggataatigut ilaquttatillu pilluaqqussavassi siunissamilu ajunnginnerpaanik tamanik kissaallutit."

Simon Petersen Pilersuisoq Aappilattumilu suleqatini tamaasa peqatigalugit

Mina Petersen aamma Simon Petersen.