Qaanaami pisiniarfik nutarsareerluni ammaanersiorpoq

Ippassaq ataasinngornermi sialualaartoq Qaanaami Pilersuisoq nutarsarneqareerluni ammaanersiorneqarpoq.

Ullaakkut qulingiluanut pisiniarfiup silataani sulisut assukkersorsimasut nunaqqataasullu katerimmata ammaanersiorneq niuertumit Larsigne Kvist-imit oqalugiarnermik aallarnerneqarpoq.
- Assorujuk ammaanersiornermut nuannaarpunga pissangallungalu unami qangalinngortumik pilersaarut naammassillugu peqqittukassaalluta ammaanersiorneq tikikkatsigu, oqarpoq Larsigne Kvist.

Eqqaaniaaneq
Ammaanersiorneq misigissutsikkut attortiffiusimavoq suleqatigisimasamik eqqaaniaanermik imaqartinneqarmat.
- Nukittoorujussuullunga nuannaangaarlunga aallartikkaluarpunga, pisulli pisimasut kingumut eqqaariarakkit pilersaarummik aallartitsisimasoq Pilersuisup pisortarisimasaa Niels Andersen-ip ammaanersiornermut peqataasussaanera takorloortarsimagaluarakku. Toqukkut qimagussimanngitsuuguni akornatsinniissimasinnaanera takorloornermik killitsikkama. Kisianni qujanartumik ajunngitsumik oqalugiarnera naammassivoq, Larsigne Kvist misigissutsikkut attortissimaaqaluni oqaluttuarpoq.

Oqalugiartoqareermat eqqaaniaasoqareermallu erinarsoqatigiittoqarpoq ’Nunaga-aa Nunarsuup avannaani’ atormassuk. Qaanaami sivisunerpaamik sulisimasoq Sofie Jensen pisiniarfik ammarlugu qiorsitinneqarpoq. Qummoroortartoqareermat pisiniarfimmi kaffillertoqarpoq qilaatersortoqarlunilu.

Pilersuisup pisortarisimasaa Niels Andersen eqqaaniarneqarpoq.

’Nunaga-aa nunarsuup avannaani’ erinarsorneqarpoq.

Qaanaami Pilersuisumi sivisunerpaamik sulisimasoq Sofie Jensen qiorsisuuvoq.

Pisiniarfimmi kaffillertoqarpoq.

Qilaatersortoqarluni aliikkusersuisoqarpoq.