Sarfannguani Itillimilu pisiniarfiit nutarterneqartut

Sisimiut eqqaanni nunaqarfinni Sarfannguani Itillimilu Pilersuisup pisiniarfii nutarterneqaqqammerput piareerlutillu. Kangerlussuarmi Pilersuisup pisiniarfiata iluata isikkua malillugu pisiniarfiit pineqartut ilui maanna aaqqissuunneqarsimalerput.

Nutarterineq pisisartunut qanoq malunniuteqassava?

Finn Fabricius, Pilersuisup pisortaa:

- Pilersuisup pisiniarfiisa nutarterneqarnissaannut alloriarneq siulleq pivoq Kangerlussuarmi kingornalu Itillimi Sarfannguanilu pisiniarfiit nutarterneqarmata. Qaammat una kingusinnerusukkut Tasiilami Pilersuisup pisiniarfeeraa, nærbutik, nutarterneqassaaq ukiorlu manna naatinnagu Nanortalimmi pisiniarfiit marluusut nutarterneqareersimassapput. Nutarterinermi iliuusissat tamarmik assigiissapput. Atortut taartumik qalipaatillit pisiassat qalipaataannik ersarinnerulersitsisut ikkussuunneqassapput, pisiniarfiit isuaniittut illugiit iikkat qorsummik qalipaateqassallutik taamatullu aamma qalipaateqassapput qilaap atinnguaniittut iikamiittut qisuit. Pisiniarfinni kioskit aamma allannguiffigineqassapput nutaaliaanerulerlutik ornikkuminarnerusunngortinneqassallutillu, tamannalu FastFood-inik BakeOff-inillu neqeroornitsinnut tuniniaanitsinnullu mikinngitsumik sunniuteqassaaq.

- Pisisartutta malugissavaat pisiniarfik nutaajunerusoq atortuilu ilioqqarneqarnermikkut ullutsinnut naleqqunnerusut, qalipaatit isigiuminartut kialaarut sulisullu sullisaannut nutaanut naapertuutut.