Pilersuisup Slagter Theilgaardimeersut neqit assigiinngitsut peerpai.

Pisisartut arlallit Slagter Theilgaardimeersut neqit, Pilersuisumi ilaatigut pisiassaasut, naammagittaalliutigereeraallu Slagter Theilgaard nalunaarpoq nioqqutit ilaasa assartornerini qeritsitsivinni ajortoqarsimasoq, nioqqutillu taakku pisiniarfinniit piiarneqarput.

Slagter Theilgaardip nioqqutimi ilaasa assartorneranni qerititsivinni ajortoqarsimasoq paasivaa, tamannalu neqit assigiinngitsut igiinnartariaqalernerannik nerinissaannullu tulluukkunnaarnerannik kinguneqarpoq.

Neqit pineqartut tassaapput neqit aserortikkat, Rib Eye, Engelske bøffer, peberbøffer, medisterpølsit kiisalu culottesteg. Neqit aserortikkat pisiniarfimmiit peerneqavipput, ukulu eqqaaneqartut sinneri misissorneqarnissaata tungaannut piiarneqarallarput. Misissuineq sapaatip akunneranik ataatsimik sivisussuseqarsinnaavoq.

- Pisisartut eqqummaarinnerannut qujaffigerusuppakka, nioqqutissanillu ajortunik naammattuuigunik KNI toqqaannaq saaffigissagaat qinnuigerusullugit. Una pisoq ajuusaarnartorujussuuvoq, utoqqatsissutigaaralu saaffiginnissutit tigusartakkagut sukkanerusumik iliuuseqarfigisimannginnatsigit, Pilersuisumi pisortaq Brian Weuge Chemnitz oqarpoq.

Slagter Theilgaardip pisoq aamma ajuusaarutigaa.

- Pisoq assut ajuusaarnarpoq, naqissuserusupparpullu Pilersuisumut Kalaallillu Nunaannut nioqqutissanik pilersuinerput tulluusimaarutigisorujussuugatsigu nuannaarutigalugulu. Taamaattumik assut ajuusaarpugut nioqqutissaatitta pitsaassusissaat, ilissi uagullumi naatsorsuutigisarput, tunniussinnaasimannginnatsigu.

 Slagter Theilgaard maanna nioqqutissanik nutaanik sanaleruttorpoq, taakkulu piareeriarpata Pilersuisup piaartumik pisiniarfinni nioqqutissaatigileqqissavaat – tamanna aamma pissaaq illoqarfinni sikusartuni.

- Nioqqutit assartornerini qerititsiviit ajutooqqinnginnissaat sulissutigaarput. Neriuppugut piffissap ingerlanerani nioqqutigut tatigineqaqqilerumaartut, maannakkumi peqquteqartumik tatigineqarnerat innarlerpoq, Slagter Theilgaard taama oqaaseqarpoq.

Pisisartut qulaani taaneqartunik neqinik pisisimagunik Pilersuisumukarlutik akia utertissinnaavaat.