Pilersuisup pisiniarfiinik nutarterineq

Sinerissami Pilersuisup pisiniarfiinik nutarterineq aallartilluarsimalerpoq

 

Pilersuisup pisiniarfiisa isikkuisa nutarterneqarneranni atortut nutaaliaasut qiimasunik qalipaatillit ikkussuunneqarput. Nutarterineq kingulleq Nanortalimmi naammasseqqammerpoq taqqavani pisiniarfissuaq pisiniarfillu mikineq 2,5 mio. kronit missaannut nutarterneqaqqammermata.

Finn Fabricius, Pilersuisup pisortaa:
- Nanortalimmi Pilersuisup pisiniarfiisa nutarterneqarnerisigut iffioriikkanik uunnaasarfimmik Bake Off-imik Nanortalimmi peqalerpugut. Taamaasilluta pisisartutta qangalili kissaatigisimasaat naammassisinnaalerparput, tassalu iffioriikkanik kissatanik nioqquteqarsinnaaleratta. Tamatuma saniatigut nerisassanik fastfood-inik nioqquteqarsinnaalerpugut. Oqarsinnaalerpugut kitaani illoqarfiit kujallersaanni pisisartutta piumasaat uatsinniillu naatsorsuutaat pisiniarfiit nutarternerisigut naapertuuttumik maanna naammassisinnaaleratigu. 

Nanortalimmi assassorlutik suliaqartut suliffeqarfiit saniatigut Nanortallup eqqaani nunaqarfinni niuertut, Nanortalimmi suleqatigut Sisimiunilu kiffartuussivimmeersut nutarterinermi 8. november – 24. november 2016 ingerlanneqartumi ikiuupput.

Nutarterineq pilersaarutaasoq aallartippoq, Pilersuisullu pisiniarfii 66-it nunarput tamaat inissisimammata suliassaq ingerlaannaq naammassisinnaassanngilaq.

Pisiniarfinnik nutarterinerup piviusunngortikkiartornera maannamut tassa Nanortalimmi aammalu Kangerlussuarmi, Sarfannguani, Itillimi kiisalu Tasiilami pisiniarfeeqqami ingerlanneqareerpoq. Tullinnguuppoq Aasianni Pilersuisup pisiniarfiata januarimiit nutarternissaa taannalu pilersaarutit malillugit 1. februar 2017 naammassissaaq.  

/3.12.2016

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl