Pilersuisumi pisortaq nutaaq piareersimavoq

Pilersuisoq nutaamik pisortartaarpoq.

Pilersuisumi maannamut pisortaasoq Finn Fabricius tallimanngornermi 28. april 2017 kingullermik sulivoq. Tamannalu malunnartinniarlugu KNI A/S-ip Sisimiuni kiffartuussiviani suleqatinut ikinngutinullu ilasseqatigiissitsisoqarpoq, Finn kusanartumik inuulluaqqujumallugu.

Niels Andersen Pilersuisumi atorfittaaminut pisortatut sulilernissaminut piareersareerluni aallartinnissaminut qilanaarpoq. Niels Andersen maajip aallaqqaataani KNI A/S-imi sulilerluni aallartittussaavoq, taassumalli sioqqullugu ukiuni arfineq marlunni Pilersuisumi pisortatut atorfeqarsimasoq Finn Fabricius peqatigalugu atorfimmut piareersaaneq ingerlanneqarsimalluni.

Niels Andersen:

"Sapaatip akunnera kingulleq sulilernissannut piareersarlunga maani Qitiusumik kiffartuussivimmiippunga, suleqatitaassamalu ilassilluaqaannga. Inuit sulilluartut akornanni sulilernissara qilanaareqaara.

KNI/Pilersuisoq periusissioreernikuuvoq, maannangaarlu takusinnaalereerpara ukiuni kingullerni KNI/Pilersuisoq Finn-ip suleqatinilu assorsuaq ineriartortitsisimasut. Suliaasa angusaasalu pitsaasut nanginnissaat qilanaaraara, ilissilu peqatigalusi suli Pilersuisup angusarissaarnerunissaa suliarissavarput.

Pisiniarfisi kusanartut ilissilu alakkartaarnissaat qilanaaraara. Naggataatigut naleqartitavut naqissuserusuppakka:

PISISARTUNIK QITIUTITSINEQ – AKISUSSAASSUSEQ – NUTAAMIK EQQARSARNEQ – SULEQATIGIINNEQ

Eqqaamallutigit malikkutsigit qularinngilara Kalaallit Nunaanni suliffeqarfiit pitsaanersaat pilersissagipput kiisalu pisisartut pisiniarfigerusunnarnersaatissagaatigut."

Finn Fabricius:

"Niels Andersen-ip Pilersuisumi pisortanngorneratigut KNI-mut Pilersuisumullu siunissaq qaamasuusoq takusinnaavara. Niels Andersen NIUERTUUVOQ Pilersuisutullu ittumut aqutsinissamini eqqortunik piginnaaneqarpoq.

Qularinngilara Niels Andersen-ip misilittagai tunniussinnaasaalu sinerissami qitiusumillu kiffartuussivimmi sulisut tamarmik iluaqutigiumaaraat.

Niels, KNI-mi Pilersuisumilu sulisut tamaasa siunissami ajunnginnerpaanik tamanik kissaappakka, kiisalu ukiuni arfineq-marlunni KNI-mi sulisiminaninnut qujanarujussuaq".