Niuertoq piniartorlu

Otto Umerineq Pilersuisumi Kuummiuni.

 

Otto Umerineq Kuummiuni niuertuuvoq, imminulli ilisaritissaguni niuertutut piniartutullu taarusuppoq.

Otto niuertorpaaluit assigalugit ukiut arlallit KNI-mi sulinikuuvoq, taamanikkut 20-nik ukioqarluni KGH-p nalaani pisiniarfiup silarsuaanut appakaakkami. Siullermik pisiniarfimmi ikiortitut.

- Taamani pisiniarfimmi ningiup sulilersinnaanersunga arlaleriarluni saaffigisarpaanga, naggataatigut misilikkusuummeriarakku akuerinikuaara, taamaattorli takorloorsimanngisaannarpara pisiniarfimmi sulisuuinnarnissara kingornalu niuertunngornissara, Otto oqaluttuarpoq.

Ottomi piniartussatut perorsagaavoq.

- Ilitsorivunga ataataga piniaqatigalugu. Aasami umiatsiamik, ukiukkut qimussimik. Taamaattumik sumut ingerlanissara qularinngilluinnarnikuuara, Otto oqarpoq.

Ottolli aqqutissaa allaanerusussaasimavoq. Ukioq manna niuertutut ukiut 24-nngussavai.

Otto 58-inik ukioqarpoq, nuliaqarpoq tallimanillu qitornaqarluni. Aataajuvoq, arfinilinnik aamma ernutaqarami. Otto Kuummiuni niuertuuvoq. Kuummiut ullumikkut 248-nik inoqarpoq, ukiullu kingulliit eqqarsaatigissagaanni inuerukkiartorsimalluni.

Pisiniarfimmi ikiortitut sulinera uterfigeqqilaarutsigu.

Otto sulileqqaarami nioqqutissalerisarsimavoq, sulininilu sungiulluariaramiuk karsi ilinniarlugu aallartissimallugu. Taamaalluni allaffimmi sulisutut misileeqqusaagami allaffimmiutut aamma ingerlasimavoq.

- Ukiut taakku, 1980-ikkut ingerlaneri, uannut ineriartuutaasimaqaat. Sulilerpunga pisiniarfilerinerup silarsuaanik ilisimasaqaavinnanga, Otto oqaluttuarpoq.

KGH-p ataani pikkorissarnerit arlallit Ottop peqataaffigisarsimavai, KNI-mullu ikaarsaarnerup nalaani niuertuunermut naatsorsuutilerinermullu pikkorissarnerit aamma peqataaffigisarsimallugit.

otto-umerineq-630px-02.jpg
Kuummiuni Pilersuisumi sulisut ilaat.

Niuertunngoqqaarnera

Erniinnannguaq martsimi KNI-mi niuertunngorniarneq ingerlanneqaqqilerpat Otto peqataasussaavoq, pissangaqaarlu.

- Aatsaavissuaq ilinnialerama qilanaaqaanga. Maani Kuummiuni niuerneq ingerlalluaraluartoq nutaanik sakkussanik inuttullu alloriassutaasinnaasunik pissarsinissara iluaqutaassaqaat. Maanimi niuertuinnartut sulinngilanga. Mittarfilerineq, aningaaserivilerineq, tankilerineq umiarsualerinerillu suliassama aamma ilagaat, Otto oqarpoq.

Taakku saniatigut allakkerineq Ottop aamma akisussaaffigaa. Niuertuunerummi saniatigut nunaqarfimmi ingerlatat allat Ottomiit akisussaaffigineqarput aamma.

Ottop niuertunngoqqaarnera aamma oqitsuinnaasimanngilaq.

- Taamani 1996-imi niuertunngoqqaarama oqarsinnaavunga ukioq ataaseq putsup iluaniillunga. Nalorsarnikooqaanga, ukiorlu ataaseq qaangiummat paasitinneqarpunga niuertussamik allamik ujaasisoqalersoq. Ittutsinnulli siunnersortaasup ittorput pisimavaa, atagu ukioq ataaseq aatsaat qaangiuppoq. Misiliiseqqaalaartigu. Taamani periarfissinneqaqqikkama allatut iliortariaqarlunga aalajangerpunga. Inuttut tunuarsimaartuujuaannarnikuuvunga, niuertutulli sulissaguma tamanna allanngortittariaqarpara. Tassanngaalli sukanganerusumik aqutsilerpunga, ukiullu tulliuttut ingerlanerini ingerlanerput pitsanngoriartuaalerpoq, massakkullu sinneqartoortuaannarpugut naak Kuummiut inuerukkiartornikuugaluartoq, Otto tulluusimaarluni oqarpoq, ilanngullugu oqaatigalugu suleqatigiit qulingiluaallutik (ilinniartoq ilanngullugu) suleqatigiilluartorujussuullutik, niuertutullu Tasiilap eqqaamiuinut Sermiligaamut, Tiilerilaamut Kulusummullu ikiortaajartorluni aamma angalasarluni.

Otto imminut piniartutut aamma taajumavoq. Sunngiffimmini pinialorusaartuarpoq, puisitarpassuamilu saniatigut arfineq marlunnik aamma nannunnikuusimalluni.

- Qilalukkallu katillugit 39-t, Otto naggasiivoq.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl