Niuertut nasaararpassuallit

Edvard Frederiksen, Qeqertaq

Suliffimmut nuannarinninneq akisussaaffimmillu annertuumik peqarnissaq pingaartippaa, taakkulu pigissallugit pingaartuupput, ullummi ilai unamminarsinnaasarmata, niuertoq oqarpoq.

Edvard Frederiksen, ulluinnarni Taqqi, 54-inik ukioqarpoq Pilersuisumilu Qeqertami, Ilulissat nunaqarfiisa ilaanni, niuertuulluni.

Inuit 103-t missaanniittut Qeqertami najugaqarput, Pilersuisoq tallimanik sulisoqarpoq taannaallunilu nunaqarfimmut nioqqutissanik annerusumik pilersuisuusoq, taamaattumik Edvard ulapaartuuvoq. Qeqertami Pilersuisup saniatigut pisiniarfeeraqarpoq, taannali unnukkut akunnerit pingasuinnaat ammasartuuvoq.

Edvard Oqaatsuni inunngorpoq KNI-milu ukiut 40-t sulinikuulluni. Taamaasilluni niuertuunerup silarsuaani misilittagaqarluarpoq.

Edvardip ukiuni 40’ni sulisimanera uterfigeqqissavarput. Marlunngornerup ullaatungaa inuttaa oqarasuaatikkut pissarsiaraarput.

- Niuertuuniaraanni teqqiarpassuaqartariarpoq, Edvard niuertuuneq qanoq innersoq aperineqarami taamak aallartippoq.

- Pisiniarfiup ingerlannerata saniatigut suliassaararpassuit assigiinngitsuupput. Nioqqutissanik, ajornanngippat, amigaateqarnaveersaartarpugut, pisiniarfik iseruminartuussaaq, torersaanerit, eqqagassat, allakkat pisiassallu tikittut suliassat ilagisarpaat, Edvard qiimarpaloqisoq oqaluttuarpoq.

Edvard ukiut 40-t KNI-mi sulinikuuvoq. Aasaq manna Dronningip nersornaasiuttagaanik saqqarmiulerneqarpoq. Edvardi 1979-imi KGH-mi Oqaatsuni pisiniarfiani sulilerpoq, ukiullu ingerlanerani KNI-p ineriartorneranut malinnaalluarsimalluni.

- Siornatigut pisortat, niuertut aqutsisullu allat taakkuunerusarput kisimiillutik oqartussaanerusartut. Massakkut pissutsit allanngornikooqaat, sulisut tamarmik suliffeqarfimmut sunniuteqartussaapput, sulisullu peqataatinneqartorujussuullutik. Nuannersoq aamma uaniippoq, sulisut piginnaasatik qaffassarnissaannut ilinniaqqinnissaannullu periarfissaat aallunneqartorujussuanngornikuupput. Tamanna assut iluarpoq, Edvard isummersorpoq.

- Taakku aamma pisooqataalluarput suleqatinut suliffeqarfimmullu atalluartunut misigininnut, taanna pingaaruteqarpoq, Edvard oqarpoq.

Unamminartut peqqinnerlu

Niuertuuniaraanni naapitassat arlaqartarput, pisiniartullu kissaataat tamarmik piviusunngortittuaannarneqarsinnaanngillat, ingammik nunaqarfimmi sikusartumi inissisimagaanni.
Pajuttaat ullut 14-ikkaarlugit tikittaraluarpoq, ukiukkut timmisartoq sap. akunneranut ataasiarluni aamma tikittarpoq taamatullu allakkat poortukkallu sap. akunnerat ataasiarlutik aamma tikittarput. Pisisartullu nioqqutissanik kissaataat pigineqartuaannarusukkaluarlutik ilaanni ajornakusoortarpoq.

- Assersuutigalugu massakkut mannivinnik nunguttoorpugut. Manninnik qerisuuteqartarpugut, pisiniartuttali nioqqutissaq aaliangersimasoq amigaatigippagu pajuttaatip tikeqqinnissaa utaqqisariaqartarparput. Soorlu naatitat grønsagillu. Ukiukkut taakku ilarpassui nutaanngilereerlutik tikittarput, Edvard nassuiaavoq ilanngullugu oqaatigalugu, pisisartut suut pisiarerusunnerusarneraat soorunami aamma ilikkarnartartoq.

Naatitat grønsagillu eqqaariaratsigit. KNI-p inuit peqqissuunissaat pingaartitaasa ilagaat, assersuutigalugu Mamarisavut pilersinneqarnikuuvoq, tassani Pilersuisumi sineriammi tamarmi tunngaviusumik pisiassaasinnaasut aallaaviullutik peqqinnartunik nerisassiorsinnaanermik isumassarsiorfigineqarsinnaapput.
Peqqissuunissaq Qeqertami Pilersuisumi aamma pingaartinneqarpoq. Ulluinnarni naatitanik grønsaginillu pisiassaqarsinnaaneq pingaartinneqartut ilagivaat, pisiassallu Nøglehulsmærkillit aamma (nerisassat fibereqarluartut, orsukitsut, tarajukitsut sukkukitsullu ilisarnaataat).

- Qeqertami inuit peqqinnertik aallunnerulernikuugaat maluginikuuarput. Soorlu naatitanik akikilliliigaangatta, qulit 25 koruuninik akilersillugit, inuit amerlanerusut pisiniarnerusalernikuupput, Edvard ilisimatitsivoq.

Ilinniarneq iluaqutaalluartoq

Niuertutut inuuneq Edvardip ilaqutaanullu nutsernermik aamma kinguneqartarnikuuvoq. Edvard nuliaqarpoq pingasunillu qitornaqarlutik, maannalu inersimalereersunik pingasunik Edvard aamma qitornaqarluni.

- 1994-imi Oqaatsuni niuertutut sulileqqaarnikuuvunga, Oqaatsunilu ukioq 2002 ilanngullugu najugaqarpugut. Taassuma kingorna Qeqertanut nuuppugut, 2014-imilu Saattuni niuertunngorniarlunga aamma nuunnikuuvugut. Ukiut marluk qaangiummata Qeqertanut uterpugut, Saattuni tulluartumik inissaqannginneq pinerullugu, Edvard oqaluttuarpoq eqqaallugulu nutaanik misiliinissaminut tunuarsimaartuunani taamaattumillu sumiiffinni assigiinngitsuni niuertuuneq misilikkusutaasa ilagisarlugu.
2019-imi KNI-p niuertunngorniartunut ilinniarfianut Edvard peqataanikuuvoq. Ilinniarfillu taanna ulluinnarni sulinerminut pingaarutilerujussuartut isigaa.

- Ukiorpassuarni niuertutut misilittagaqaraluarlunga, niuertunngorniarneq pissarsiaqaatiginikooqaara. Ineriartornikuuvunga, sulinerup tungaatiguinnaanngitsoq, inuttulli aamma, Edvard naggasiivoq.

Qeqertami Pilersuisoq.

Qeqertami Pilersuisoq iserlugu.