Akisussaaqataaneq kajumissaasiinermik kinguneqarpoq

Innaarsunni Pilersuisoq ukioq 2017-mi susassaqartitsisarnermi akisussaaqataalluartarsimasutut qujaniarfigineqarluni kajumissaaserneqarpoq.

Innaarsunni sunngiffimmi pisortap Pilersuisoq nunaqarfimmi annertuumik nuannaarnermik tunisisarneranut qujaniarfigaa.

- Inuiaqatigiinni akisussaaqataanersi Innaarsunni avataaniillu takkuttunut nuannaarnermik tunniussaqartarpoq, taamaattumik qujaffigiumavassi neriullutalu taamatut tapersersuisarnertik siunissami ingerlatiinnassagissi, Innaarsunni sunngiffimmi pisortaq Susanne K. Eliassen taama oqarpoq.

Pilersuisumi niuertup kajumissaaserneqarnertik assut tulluusimaarutigaa suleqatigisartakkatillu qujaffigalugit, taakkuummata aaqqissuussanik piviusunngortitsisartut. Pingaartumik Nutaraq-82 Innaarsunni nunaqarfinni allani qanittuni aaqqissuussinernik ingerlanneqartunik piviusunngortitsiuartoq qujaniarfigaat.

- Pilersuisumi inuiaqatigiinnut akisussaaqataanerput pingaartitaraarput ulluinnarni inuussutissanik pisiassaqartitsinissarput piinnarnagu sunngiffimmilu susassaqartitsinernut allanullu tapersiilaarnissarput siunertamut pitsaasumut tunuarsimaarniartanngilagut. Suliffeqarfissuattami KNI-p CSR inuaqatigiinnut akisussaaqataanerput pingaartitaraa, Mette Kristensen Innaarsunni Niuertoq taama oqarpoq.

Nangillunilu:

- Minnerunngitsumik KNI-p ataani aningaasaliisartutsinnut qujavugut, tapersiisarneq Innaarsummiunuinnaq tuttanngilaq arsaqattaarnermimi allanilu sammisaqartarnerni assigiinngitsuni  eqqaamiugut timersornermut kajumillutik peqataasartunut aamma nuannaarutaasarpoq, Mette Kristensen naggasiivoq.

Innaarsunni Pilersuisoq KNI-p kiffartuussivia suleqatigalugu aaqqissuussisoqarnerani ilaatigut pokalinik ujamminik assigisaannillu tunissuteqartarnermigut tapersiisarpoq.