Martha Mikaelsen saqqarmiulerneqarpoq

15. oktober 2020 KNI-p Kiffartuussiviata Nerisarfiani Tasiilami Pilersuisup pisortaa Martha Mikaelsen ataqqinartorsuup Dronning Margrethe II-aata nersornaasiuttagaanik Fortjenstmedalje-mik sølv-iusumik saqqarmiulerneqarpoq.

Nalliuttorsiorneq ammarlugu KNI-mi pisortaaneq Peter Grønvold Samuelsen oqalugiarnermini ilaatigut ima oqarpoq:
“Asasara Martha uiillu Tuuma qamannga pisumik tikilluaritsi. Qularutiginngilara ilissinnut ilaquttassinnullu ulloq angisuujusoq, uagullumi KNI-mi suleqataasugut nalliuttorsiorpugut ulloq peqatigalusi malunnartikkusukkatsigu.”

“Martha ukiorpassuit matuma siornatigut KNI-mi, taamanikkut KGH-jusumi sulilersimavutit, upernaarlu 24. april 2020 ukiuni 40-inngortorsiorlutit. Maannalu ataqqinartorsuup Dronning Margrethe II-p pisortat suliffeqarfiutaanni ukiorpassuarni aalajaallutik tunniusimallutillu sulisi-masunut nersornaasiuttagaa Fortjenstmedalje sølv-iusoq sakissannut kapputissavara.” Pisortaaneq oqarpoq, nangillunilu:

“Tamaanga killinnissat taamanikkut takorloorsimassanngeqqooqaat. Ukiunimi 40-inngortorsiorninnut atatillugu oqaaseqaravit ilaatigut oqaluttuarisimavat, taamanikkut niuertuusumit pisiniarfimmukaqquneqarsimasutit, aperineqarlutillu allassinnaanersutit aamma 10 tikillugu kisitsisinnaanersutit. Tamakkulu sapersaatiginnginnakkit KGH-p pisiniarfiani atorfinitsinneqarsimallutit.”

“Takorloorsinnaavara ukiut 40-it ingerlanerini suliffinni qaffakkiartuaarsimanerit ikiortitut aallartinninninngaaniit maannamut Regionschef-itut atorfeqalersimallutit piffissallu ingerlanerani suliffimmut atatillugu angalanerparpassuit, ullorpassuarni angerlarsimaffik ilaquttallu qimassimasariaqartarsimassagitit, saniatigullu Tuumalu qitornasi sisamaasut pitsaasumik perorsarnissaat ilinniagaqarnissaallu qanoq pingaartitsigigissi ilisimagakku. Tassami panisi angajulliit marluk sygeplejerske-tut ilinniagaqarput, aqqaluaat sanasutut ilinniagaqarluni, panissilu nukarleq maanna ukiut aappassaa Nuummi GU-mi ilinniarluni. Illit nammineq oqaatigisarsimasatit issuassagaanni, suliffinni maannamut killiffiit taamaallaat angusinnaasimagit uippit Tuumap tapersersuiuarsimanera pissutigalugu. Ilittut ittumik aalajaatsumik pikkorissumik tunniusimasumillu suleqateqarnitsinnut Tuuma illit annertuumik qujassutissaqarfigaatsigit, qujanarsuaq, illittaaq ullumikkut pilluakutsoorit. Taamaalillusi ilissi nunaqqatissinnut maligassaqqissuuvusi.”

Martha, ilaquttatillu, pilluakutsooritsi, qujanarlu KNI-mi suliffimmi aalajaallutit ilumoorlutillu suli ulloq manna angullugu suliuarninnut. KNI-mi sullissineq, inuiaqatigiinnut nunaqqataasunullu tamanut sullissineruvoq pingaaruteqartoq.

Pisortaaneq oqaaseqareermat Martha-mullu saqqarmioq tunniutereermagu, attaveqaatit iluaqutigalugit toqqaannartumik Tasiilami Pilersuisup pisiniarfianit erinarsoqatigiit Ingeratsili erinnanik marlunnik tusarnivissunik atuipput. Taavalu Marthap suleqatai aamma pilluaqqusillutik.

Martha Mikaelsen-ip uia Thomas Mikaelsen KNI sinnerlugu pisortaanermit qutsavigineqarpoq tunineqarlunilu, nuliaminik tapersersuiuarnermigut KNI pikkorissumik aalajaatsumillu suleqateqarsinnaanissaanik qulakkeerinneqataasimasutut.

Thomas Mikaelsen oqaaseqarpoq. Nuliani asasani pilluaqquaa ukiuni 40-ni KNI-mi sulisimanera kingumut eqqaasaqarfigalugu, pisortaanerullu oqaaseqarnermini oqaasii ilumoornerarpai, Martha suliaminut atatillugu angalanerparpassui pissutigalugit qitornatik suli mikisut kisimeeqatigisarsimaneri, ilaanni suli miluttut, ilungersunartoqartarsimanerarpaa. Tuuma nuliaminut oqaaseqarnermini naasunnguamik nassarsimannginnami imminut naasunnguatut pajugutigivoq nulianilu kunillugu. Tuumap KNI suliffeqarfittut assut nersualaarpaa, sulisorpassuit siuttullu suliffeqarfissuaq inoqarfinni tamani kiffartuussilluarnera ineriartortinneqarluarneralu pillugit. KNI-mut tunissuteqarpoq, taannalu pisortaanerup tiguaa, neriorsuillunilu Kiffartuussivimmi saqqumitinneqassasoq.

Namminerlu aamma naggataatigut oqalugialaarpoq:
”Qujanarujussuaq, misigisaq sakkortoqaaq tuppallerneqalunilu.” Martha killitsissimaarluni oqarpoq.