KNI A/S-ip nammineq sulisuminut sammititaminik niuertunngorniarnermik aallartitsisoq

Qaammatinik qulingiluanik sivisussusilimmik pingasoriarluni Sisimiuniilluni atuagarsornermik ilalimmik namminerlu sulisorisanut sammititamik niuertunngorniarnermik KNI A/S aallartitseqqammerpoq. Atuagarsorneq siulleq ullunik qulinik sivisussusilik Sisimiuni aallarteqqammerpoq maanilu atuarput Pilersuisup nunap immikkoortuinut agguarneqarnerani sisamaasuni aggersut angutit arfineq pingasut arnallu sisamat.  

Niuertunngorniarnermik aallartitsisut pisiniarfinnik ingerlalluartunik ingerlatsinermik ukiuni arlalinni misilittagaqareerput. Taamaattumik pisiniarfimmik ingerlatsineq taakkununnga nutaajunngilaq, mannali atuarneq aqqutigalugu suleriusissiornermut, niuernermut pisisartunullu tunngasunik ilisimasaat paasinninnerallu suli nukittunerulerlunilu annerulissaaq. 

Peter Grønvold Samuelsen, pisortaaneq:
- Piginnaanngorsaanermik suliniutitut aallartitatta qulakkiissavaat KNI A/S-ip anguniagassatut siunniussaata suleriusissatullu aalajangiussatta piviusunngortinnissaa. Aammali unammillikkatta suunnerat taakkulu ullut tamaasa ukioq kaajallallugu uatsinnik qanoq piumasaqarnerat ilisimaarilluinnarparput.  Aningaasaqarnermut tunngasut imaannaanngitsumik sunniuteqartuarput, ilinniarsimasut atorfissaqartitagut naammanngillat kiisalu nunani allanisuut innuttaasut illoqarfinnut anginernut noorarnerat aamma uagut atugaraarput taamaasilluni Pilersuisoqarfinni 66-usuni ingerlatsiniarnerput sunnerneqarluni.  

- Piginnaasatsigut naleqqussarnissamik tamanna piumasaqarpoq. Tamatuma malitsigisaanik suliffeqarfitsinni tamarmi piginnaanngorsassaagut pisisartorlu qitiutissallutigu. Tamanna pissutaavoq Niuertunngorniarnermik KNI A/S-ip nammineq aallartitsissalluni aalajangerneranut, tamannalu inimi atuartitsiviusumi Taqqissuummi ingerlanneqassaaq. Qularutiginngilaralu holdit siulliit aallartittut takutissagaat aalajangernerput eqqortuusoq. 

Paasissutissat

Niuertunngorniarneq pillugu

KNI A/S-ip niuertunngorniarnermik nammineq pilersitsinermini suleqatigivaa Mindbiz, ilinniartitaanerup annersaanik ingerlatsisussaq, tamannalu pissaaq sulisunik ineriartortitsinermut immikkoortortaq HRD qanimut suleqatigalugu. Ukiut tamaasa ilinniartut 12-it piukkunnarnersiukkat aallartittassapput. Niuertunngorniarneq KNI A/S-ip nammineq aningaasalerpaa. 

Peqataasut 12-ut:

• 1-seq Tunumeerpoq, 3-sut Avannaaniit, 3-sut Kujataaniit, 5-at Qeqqaniit.

• 5-at nunaqarfinneerput 6-llit illoqarfinneerlutik, 1-seq Kiffartuussivimmiit.

• 5-at niuertuupput, 5-at pisiniarfiup pisortaat, 1-seq tuniniaanermut pisortaq, 1-seq tullersorti.

• Ukiui agguaqatigiissillugu 43,5

• Tamarmiullutik agguaqatigiissillugu ikiut 13,2 sulisimapput, peqataasulli 4-at akornanni ukiut 29-it.

Pilersuisoq KNI A/S pillugu

Inoqarfinni pisiniarfiit 66-it ingerlannerisa saniatigut sulisut katillugit 550-usut suliassat makku aamma ingerlatarivaat:

• Umiarsualivinnut oqartussaasut sinnerlugit nunaqarfinni 52-ni

• Grønlandsbanken sinnerlugu illoqarfinni nunaqarfinnilu 63-ni

• Mittarfeqarfiit nunaqarfinni 38-ni

• Air Greenland nunaqarfinni 41-ni

• Arctic Umiaq Line nunaqarfinni 8-ni

• Royal Arctic Line nunaqarfinni 6-ni

• Royal Arctic Bygdeservice nunaqarfinni 51-ni

• Telepost nunaqarfinni illoqarfinnilu 55-ni

• Blue Water illoqarfinni 6-ni

Pilersuisup saniatigut KNI A/S-imut ilaapput Polaroil, Pisisa.gl, KNI Engros kiisalu Neqi. Taakkua tamarmik inuuniarnermut pingaaruteqartumik Kalaallit Nunaat tamakkerlugu pilersuisuupput.

Atuaqatigiit assingat:
Saamerlermiit: Tuniniaanermut pisortaq Ole Løvstrøm (Sisimiut), pisiniarfiup pisortaa Jørgen Mørch (Paamiut), pisiniarfiup pisortaa Thomas Kristoffersen (Narsaq), niuertoq Susanne Kristiansen (Tasiusaq, UPV), niuertoq Kristian Liilu Lyberth (Kangaatsiaq), niuertoq Marie T Larsen (Kangerlussuaq), pisiniarfiup pisortaa Erik Immanuelsen (Upernavik), niuertoq Mette Kristensen (Innaarsuit), tullersorti Aviaja Abelsen (Tasiilaq), pisiniarfiup pisortaa Hans-Erik Enoksen (Nanortalik), niuertoq Ulloriaq Kristiansen (Kangaamiut), pisiniarfiup pisortaa Ove Jerimiassen (Aasiaat).