Kirsten aamma Jens Olsen Svendsen

Ataqqinartorsuup Dronningip nersornaasiuttagaanik sølviusumik Upernavimmi saqqarmiuliineq

Kirsten Svendsen, Upernavimmi ukiorpassuarni Pilersuisumi sulisoq ukiut 40-it aalajaalluni pisortani sulisimanini pillugu sisamanngornermi ull. 31. marts 2016 Innuttaasut Illuanni nersornaammik saqqarmiulerneqarpoq.

Ulloq persuarsiornartoq Kirsten Svendsenip ilaqutai Pilersuisoq Upernavimmilu suleqatai peqatigalugit nalliussineqarpoq. Saqqarmiuliisoqareermat Upernavimmi erinarsoqatigiit EP 53 atorpaat ”Sinniisiga”.

Erinarsoqatigiit allanik aamma appisimaarlutik aliikkusersuipput – guitarilisarsimariaramillu nutsugisserlutillu assorsuaq nuannisartitsipput. 

Pilersuisup pisortaa, Finn Fabricius, AVANNAANI tuniniaanermi pisortaq, Ole Løvstrøm, peqatigalugu Kirsten Svendsen saqqarmiuleriartorlugu Upernaviliarpoq.

Pilersuisup pisortaa qallunaatut oqalugiarmat tuniniaanermi pisortap kalaallisuunngortippaa.

“Asasara Kirsten, asasakka Kirsten-ip ilaqutai, asasakka suleqatit qaqqusallu tamassi – tamavissi tikilluaritsi.

KNI A/S sinnerlugu maani oqalugiarsinnaagama tulluusimaarpunga ataqqinartillugulu. Ullumikkut ulloq tamitsinnut pingaaruteqartuuvoq. Pisoq pingaarutilik immikkuullarissoq nalliussiniarlutigu katerippugut, taamaattumik ullormik malunnartitsiniarnerput ataatsimoorluta atussagipput pissusissamisoorpoq.

Katerippugut Kirsten Svendsen-ip ukiorpassuarni  KGH-mi/KNI-mi sulisimanerani ataqqiniarlutigu kiisalu Ataqqinartorsuup Dronningip nersornaasiuttagaanik saqqarmiulerniarlutigu. KNI-mi suleqatitta sølvimik saqqarmiulerneqartarnerat qaqutigoortuuvoq, taamaakkaluartoq ukiorpassuarni saqqarmiuliisoqartarnikuulluni. Ataqqinartorsuup Dronningip saqqarmiuliuttagaa kikkunnut tamanut tunniussuunneqartanngilaq, taamaattumik ullumikkut saqqarmiuliisinnaagama assorsuaq nuannaarutigaara.

Asasara Kirsten – ulloq 22. marts 1971-imiilli KGH-mi/KNI-mi sulivutit ukiorpassuarnilu taakkunani sulininni sullerillutit tunniusimallutillu suliassat assigiinngitsorpassuit suliarisarsimavatit. 16-iinnarnik ukioqarlutit pisiniarfiup silataani sulisussarsiortut takugakku ingerlaannaq iserlutit sulilersinnaanerlutit aperigavit ulloq taannarpiaq sulilersimavutit.

Sulileravit pisiniarfiup nerisassaarniarfiani nioqqutinik ilisivinnut ilioraasutut ikiortinngorsimavutit, kingusinnerusukkullu pisiniarfimmi immikkoortoqarfinni tamani sulisimallutit kiisalu materialimi iffiorfimmilu aamma sulisimallutit. Taamanikkut sulineq ullumikkumut sanilliullugu allaaneroqaaq – suna tamarmi namminersuutaaneruvoq  timikkullu artornarneroqaluni. Kivitassat oqimaatsorpassuit nammanneqartarput ullumikkutuullu atortorissaaruteqarani. Pisiniarfimmili sulineq pisinianillu sullissineq nuannariuarsimavat.

Ukiut ingerlanerini misigisarpassuaqarsimavutit – ilaatigut allanngortiterinerujussuit kiisalu KGH-neraniit ullumikkut suliffeqarfiup nutaalianngorluni KNI-nngornera malinnaavigisimallugu. Ukiut ingerlanerini assigiinngitsunik pisoqartaqartarsimavutit aaqqissuussaanerillu assigiinngitsorpassuit atugassarititaasut atorlugit sulisimallutit, sulinerilli ingerlatiinnarsimavat Upernaviullu pisiniarfiani aalajangersimasumik akuujuarsimallutit. Nammineq oqarnittuut: “Sulineq suleqatillu nuannarigaanni ukiorpassuarni sulisoqarsinnaavoq”.

Naak ilinniarsimasuunngikkaluarlutit sullerinnikkut sulinermillu nuannarinninnikkut suliassatit tamanit naammagineqartumik suliariuartarsimavatit. Sulisuuvutit pingaartinneqartoq – pingaartinneqartuarsimasorlu.

KNI A/S Pilersuisoq sinnerlugu KGH-mi/KNI-mi ukiorpassuarni sulisimaninnut qutsavigiumavakkit. Ilaquttatit tamaasa aamma qutsavigiumavakka. Ilaquttavit ukiorpassuarni tapersersortuartarsimassagaatsit qularinngilara.

Naggataatigut ilaquttatillu pilluaqqorujussuarpakkit siunissamilu ajunnginnerpaanik tamanik kissaallutit.

Maannalu KGH-mi/KNI-mi ukiorpassuarni aalajaallutit sulisimaninni  Ataqqinartorsuup Dronningip Nersornaasiuttagaanik sølviusumik saqqarmiulissavakkit.”