Igalikumi pisisartut nersualaarinnissutaat

Nunaqarfik Igaliku nunatta kujataani alianaaqisumi ippoq. Nunaqarfik nammineerluni 25-t missaanniittunik innuttaqarpoq, savaatillilli ungasinngitsumi najugaqartiterput. Inuit amerlasuut Igalikumut sulinngiffeqariartortarmata upernaakkut aasakkullu innuttaasut amerlisarput.
Niuertoq Asa Egede sulisuilu marluk, Hansigne Eliassen 28-nik ukiulik aamma Malersu Frederiksen 17-inik ukiulik, ulluinnarni niuertarfimmi sulisuupput.

Asa Egede 23-nik ukioqarpoq, taannalu 18-iinnarnik ukioqarluni Pilersuisoq Igalikumi niuertunngornikuuvoq. Asap pingaartitaraa sulisut pingasuullutik suliassanik tamanik suliaqarsinnaanissaat, taamaattumik pisisartunik sullissineq, ikummatissaasivimmi suliasat, allakkerivimmi/aningaaserivimmi suliassat, nioqqutissat ilisivinnut iliorarneqarnerat/nioqqutissanik tikittoortarneq suliassanillu allanik suliaqarneq tamarmik paarlagaallutik suliarisarpaat.

Pilersuisumi sulisut suliassat tamaasa ilisimaarimmatigit pisisartut qanorluunniit pitsaasumik sullinneqartarput, niuertumik sulisulluunniit ilaannit sullinneqaraanni tamarmik pitsaasumik sullissisarlutik.

Pilersuisup Igalikumi sullissilluarnera pisisartunit malugineqarsimavoq. Ataguli pisisartut ilaasa aana KNI-mut allagaa:

"Pilersuisup qullersaqarfia uparuunniarpara niuertarfimmi niuertup sulisuisalu nunaqarfimmi savaatillillu nunaqarfiup eqqaani najugallit nuannaarutigeqisaannik pitsaalluinnartumik sullissimmata. Inussiarnersuujuaannartuupput, tunniussaqarumallutik, ikiuukkumatullutik pisisartullu kissaataannik sukkasuumik tikisitsisarlutik. Niuertup sulisuisalu inuusukkaluaqalutik, immaqaluunniimmi inuusunnertik pissutigalugu, illoqarfinni angisuuni kiffartuussisarnerat qaangerlugu uagut pisisartuusugut pitsaalluinnartumik sullinneqartarpaatigut. Sullinneqartarnerput uagut pitsaanerusinnaanngilaq"

Pisisartut taamatut saaffiginnitsillugit nuannaajallannartaqaaq, taamaattumik tamatta – pingaartumik Pilersuisoq Igalikumi sulisut pingasuusut - tulluusimaarutissaraarput.

Suliffeqarfittut KNI-tut ittunut pisisartunik qitiutitsineq, taamaalillunilumi pisisartunik sullissineq, pingaarnerpaapaajuvoq. Pisisartuvut niuertarfimminniitik imaluunniit ikummatissaasivimmiinnitik tamaasa nuannersumik misigisaqartarnissaat suliassatsinni ullut tamaasa pingaartilluinnar- tussaavarput.

Pisisartuvut uagutsinnut pingaarnersaapput - pisisartoqanngikkutta suliffeqarfittut piuinnarsinnaanngilagut, taamaattumik paarilluarlutigillu isumagilluartussaavavut.