Bendt Abelsen Fortjenstmedalje-mik saqqarmiulerneqarpoq

Kulusummi niuertoq Bendt Abelsen 15. januar 2019 KNI-mi atorfeqarnermini ukiuni 40-inngortorsioqqammersoq, ippassaq 28. marts 2019 Kulusummi persuarsiorpalaartumik katersuunnermi Ataqqinartorsuup Dronning Margrethe II-p nersornaasiuttagaanik Fortjenstmedalje-mik Sølv-iusumik saqqarmiulerneqarpoq.

 

“Maanna illit Bent pillutit katersuuppugut, tassa qanittumi marts aallartisimalereersoq allakkat Ataqqinartorsuup illussaarsuaneersut takkupput, ammarlugit paasivarput Ataqqinartorsuup Dronning Margrethe II-p nersornaasiuttagaa Fortjenstmedalje Sølviusoq Bent Abelsen-imut, (Bent-daajimmu ilinnut) saqqarmiuliutiteqqullugu nassiunneqartoq. Pisortaanittalu Peter Grønvold Samuelsenip periarfissani siulleq atorlugu sianerfigaatit ilisimatillutit saqqarmiulerneqarnissannut innersuussut Ataqqinartorsuarmit akuerineqarsimasoq.”
Martha Mikaelsen taama oqaaseqarluni aallartippoq.

 

“Asasarput suleqaterput Bent Abelsen, qularinngilara arlaatigut suliffinnut inuiaqatigiinnullu ataqqinnillutillu ilumoortuunissannik oqaassisarsimasut maligassiuisimasulluunniit eqqarsaatinniitissagitit.

Pinngitsoortinnaangilakka Bent ilarulaadiad ilitsi imiikki qujappeerngusuppatsi, nalinngilangar ardalippaddivagajinni pippitsami tsivisiimi sulinermini perangiddarnerngarni. Naammangiddardisi dapertsersuidduardisili pilarnertsi Pilersuisuminngaanii malinginiangitsuungilarpud, damanna Pilersuisuminngaanii qujatsuliivarpud.

Qanerdi uddor manna kajiminnardimi ilarulangiiddisi alerduarniaasii.

Akisussaaqataallutit sulinerit ingerlannikuuat, suliffimmiinnaanngitsoq aammali inuiaqatigiinni suleqataanikkut tamanna takutittarlugu.
Bent, ukiut 40-it tungaannut suleqatigivakkit, taamaammat aamma ilisarisimalluarpugut, nalunngilara suliffinnut ataqqinnittuusutit suliuaannartuusutillu suliffissakkut.
Fortjenstmedalje kikkunnit tamanit pineqarsinnaanngilaq, taamaattumik pisoq manna tamatsinnut immikkuullarissuuvoq aamma qularinngilara nuliallu ikorfartoqatigiinnissigut angusaq manna maanna ilinnut nalliussineqartoq.” Martha Mikaelsen oqalungiarnermini ilaatigut taama oqaaseqarpoq.