Nioqqutissanik Upernavimmut pilersuineq pillugu

All. Finn Fabricius, Pisortaq, Pilersuisoq 

Nittartakkakkut inuit oqallittarfiisigut Upernavimmut nioqqutissanik pilersuineq annertuumik sammineqartoq KNI A/S-ip paasivaa. Ajuusaarutigaarput naatitanik, nillataartumiittussanik allanillu ataasiakkaanik pisiniarfik nunguutsisimammat.  

KNI A/S Namminersorlutillu Oqartussat kiffartuussinissamik isumaqatigiissuteqarput. Taanna naapertorlugu nioqqutissat aalajangersimasut ukioq kaajallallugu, atasinnaanerisa tikinnissaasa tungaannut, pisiniarfimmi pigineqartussaapput. Erseqqissaatigissavarput kiffartuussinissamik isumaqatigiissut naapertorlugu pinngitsoorata pisiniarfimmi pigineqartussat Upernavimmi Pilersuisumi ullumikkut pigineqarmata, tassaallutik nioqqutissat qerisut ilaatigut youghurtit, qallersuutissat, immussuit, tarngutissallu.  

Aamma imaappoq naatitat nillataartumiittussallu sapaatip akunneranut ataasiarluni timmisartukkut tikisinneqartartut assartorneqarneranni Air Greenlandip assartugassaannut sallernut ilaanngimmata. Air Greenlandip siulliutassai tassaapput ilaasut allakkallu, aatsaallu naatitat nillataartumiittussallu tamatuma kingorna assartorneqarnissamut inissaqartitaasarlutik.

Royal Arctic Linep nalunaarutigaa umiarsuaq pajuttoq siulleq Upernavimmukartoq ajoraluartumik kinguaattoortoq aatsaallu ataasinngornermut unnuaani Upernavimmut tikissasoq. Ilumoorpoq Pajuttaat ungasinngitsukkut Upernavimmiimmat fabrikkimiittunik qerisunik aallerluni. Pajuttaatip Aasianniit Upernavilialerluni aallarnissaa ullormik ataatsimik sioqqullugu aatsaat ilisimatinneqarpugut taamaattumillu Upernavimmut ingerlateqqitassanik katersinissamut periarfissaqarsimanata, Aasiannimi nioqqutissat illoqarfimmi tassani pisiniartartunut naatsorsuusaareersimammata.

Aammaarluta pisoq ajuusaarutigaarput.