Upernalernerani Qeqertarsuarmut umiarsuaq siulleq

Pajuttaat ulloq manna Qeqertarsuarmi Uunartuarsuup avatinnguani sikup sinaavanut usingiaavoq, taamalu Qeqertarsuarmiut nioqqutissanik sivitsulersumi amigaatigisimasaminnik pisiniarsinnaalerput. Aprili qaammat Pajuttaat marloriarluni Qeqertarsuarmut pajuttussaagaluarpoq, tamannali sikuunerata pingitsoortippaa.

Royal Arctic Line isumaqatigalugu KNI A/S-ip aalajangerpaa sikup sinaavanut usingiaatitsiniarluni, nioqqutissallu snescooterinik nunamut assartorneqarput. Tamanna siusinnerusukkut ileqquusarsimanngilaq, siunissamilu atornissaa pilersaarutaanngilaq.

Finn Fabricius, pisortaq, KNI Pilersuisoq:

- Sikup sinaavanut usingiaasoqarnissaanut aalajangernitsinnut sikup issussusia aalajangiisuuvoq, nalileratsigu nioqqutissat oqimaatsut nunamut assartugassat sikumut usingiarnissaannut ajussanngitsoq. Uatsinnut pingaarnerpaaq tassaavoq sillimaniarneq, qulakkeeertussaavarpummi assartuisut inuit siku pissutaalluni ajutumiinnginnissaat. Assartuinermi nalunaaquttap akunnerpassui ingerlasussaavoq.  

KNI Pilersuisoq-p neriuutigaa piffissami aggersumi Qeqertarsuarmut assartuineq sikumit akornuserneqaqqissanngitsoq.