KNI Pilersuisoq Sarfannguanut nioqqutissanik qamuteralannik pajutsitsilerpoq

Isseqimmat Sarfannguit eqqaani siku ima issutigilersimavoq allaat Royal Arctic-ip nunaqarfinnukartittagaa pajunnissaraluani marloriarluni taamaatiinnartariaqartarsimallugu. Suli issingaatsiassagunarmat suli immakkut angallisinnaaneq ajornarallarniarpasippoq.

Umiarsuakkut tikinneqarsinnaasimannginnermi maanna pisiniarfimmi nioqqutissanik amigaateqartoqartalersimavoq, taamaattumik KNI Pilersuisoq maanna nioqqutissanik pisariaqartinneqartunik pilersuinissami qamuteralannik nunaqarfiliaassisoqarnissamik suliniuteqarpoq, nioqqutissallu Sisimiuniit Sarfannguanut qamuteralannik apuunneqassapput.

Sapaatip akunnerata siuliani qamuteralaat kalittakkerlugit Sisimiuniit nunaqarfimmut pajutsinneqarput. Tallinngorneq 13. februar qamuteralaat sisamat nunaqarfiup pisiniarfianut nioqqutissanik pajutsinneqarput. Sapaatip akunnerani matumani qamuteralaat nioqqutissanik Sarfanngualiaassinissaat pilersaarusiorneqareerpoq.

Pilersuisup pisortaa Finn Fabricius:
- Nioqqutissanik qamuteralannik assartorlugit apuussisinnaanerput nuannaarutigaarput, taamaalillutami pisisartut nioqqutissat amigaatigisatik pisiarisinnaajumaaraat qulakkeerparput. Maanna qamuteralannik assartuinissaq kisimi periarfissaagallarpoq, nunaqarfimmummi qulimiguulimmik apuuttoqarneq ajorpoq, Sarfannguimmi kangerlummi ilorpasissumiilluni sikua issuallaarami angallavigineqarsinnaanngilaq.