Narsami Pilersuisup pisiniarfia
nutarterneqareerluni piareerpoq

Narsami Pilersuisup pisiniarfia nutarterneqaqqammerpoq, nutaamik kioskitaarluni, nutaamik iffiorfittaarluni nereriaannarnillu immikkoortortaqarfittaarluni.

Sivisuumik kissaatigineqarsimavoq Narsami Pilersuisup pisiniarfiani iffiorfiup nereriaannarnillu immikkoortortaqarfiata ataatsimuulersinneqarnissaat. Tamanna piviusunngorpoq, pisiniarfillu nutarterneqareerluni piareerpoq pisisartut kissaataat naapertorlugit kiffartuusserup pitsanngoriaateqarneranik malitseqartussaalluni.

Nutarterinermut atatillugu aamma nioqqutissanut ilisiviit nutaamik inississorneqarput pisiniarfimmi nioqqutissat imminnut naapertuuttunngorsarneqarsimallutik.

Kiisalu pisiniarfiup iluani aningaaserivik allaffillu maanna innuttaasunut pisariinnerusumik inissisimaffeqalersinneqarput, pisiniarfiup tunuani nioqqutissaasivik aqqusaaqqaanngikkaluarlugu tikikkuminarnerusumiilersinneqarluni. Iffiorfitoqqap matuneqarneratigut ini atorunnaarneqartoq aningaaserivittut allaffittullu atorneqalerpoq.

”Narsami Pilersuisup pisiniarfia Brugsen-imit unammillerneqarpoq, taamaattumillu pisiniarfipput DKK 1,2 mio.-it atorlugit nutarteriffigivarput, pisisartugut pitsaanerusumik kiffartuussinnaajumallugit. Taamatut aningaasaleereernitsigut naatsorsuutigaarput kaaviiaartitagut sinneqartooruteqarsinnaanerpullu pitsanngoriartissinnaassallugit. Nutarterereernermi kiffartuutassat assigiinngitsut ataatsikkut kiffartuussinnaanngorpagut, assersuutigalugu girokort-imik akiliiartorneq iluatsillugu kaffemik kage-mik illulerlugu pisisoqarsinnaanngorpoq, karsimi ataatsimi.” Pilersuisup pisortaa Finn Fabricius unnersiorpoq.

”Nutarterinitsigut pisiniarfittaarpugut nalitsinni piumasaqaatinut naapertuuttumik pitsaanerusumillu kiffartuussisinnaalerpugut, tamannalu KNI-mi naleqartitatsinnut 2016-illu tungaanut periusissiatut anguniakkatsinnut naapertuulluinnarpoq.” Pilersuisup pisortaa Finn Fabricius iluarusoqisoq oqaluttuarpoq.