Pilersuisoq pisortartaarpoq

KNI A/S-ip ataani pisiniarfinnik ingerlatsivik Pilersuisoq 66-nik pisiniarfiuteqartoq 600-illu angullugit sulisoqartoq pisortartaarpoq.

15. november 2014 aallarnerfigalugu Pilersuisumi pisortatut Finn Fabricius 50-nik ukiulik atorfinitsinneqarpoq. Finn Fabricius 17. september 2014-miit Pilersuisumi pisortaagallartutut atorfeqarpoq, taannalu sioqqullugu ukiuni kingullerni tallimaat affaq Pilersuisumi tuniniaanermut pisortatut atorfeqarsimavoq.

Finn Fabricius ukiuni kingullerni 22-ni Nunatsinni najugaqarpoq ilaquttanilu nuannarilluakkaminnik. Niuertarfeqarnerup iluani ukiuni 26-ni misilittagaqarpoq. Dansk Supermarked-imi ukiut arfinillit ingerlanerini, taassumalu pisiniarfissuisa ilaanni Bilka-mi illoqarfinni arlariinni assigiinngitsunik akisussaaffeqartarsimavoq. Nunatsinnut nuukkami Maniitsumi, Qaqortumi, Nuummi Sisimiunilu Pisiffiup pisiniarfiini pisortatut atorfeqartarsimavoq.

KNI A/S-imi pisortaaneq Peter Grønvold Samuelsen oqaaseqarpoq:

“Pilersuisumi pisortassatut qinnuteqartut arlaliusimapput. Toqqaanissarlu ajornaatsuinnaasimanngilaq, kisiannili Korn Ferry-p (pisortassarsiornermi siunnersuisartut) suleqatigilluarnerisigut ilisimasatigut inuttullu piginnaasatigut kissaatigisatsinnut naapertuuttumik qanillattuisimavugut.

Ukiorpassuarni niuertarfeqarnerup iluani sulinermini misilittagartuunngorsimanermi saniatigut Finn Fabricius KNI 2016-ip tungaanut periusissiaata ukiuni makkunani piviusunngortikkiartuaakkatsinnut naleqquttunik piginnaaneqarpoq. Sulisunik kajumilersitsillunilu ataatsimoortitsisinnaanera, ammasuunera kikkunnilluunniillu oqaloqateqarsinnaanera, inuttut aalajangiisinnaassuseqarnera, anguniagaqartuunera, Nunatsinnilu kultoorimik paasinnillunilu ataqqinnittuunera toqqaanitsinni ilaatigut toqqammavigisimavagut.

Qularutigineqassanngilaq suliffeqarfissuup KNI-ip iluani ukiuni aggersuni niuertarfeqarnerput annertuumik piumasaqarfigineqaleriartussammat. Niuertarfeqarneq sukateriffigineqassaaq nutaalianngortinneqassallunilu. Aningaasatigut angusat pitsanngoriartoratik taamaarusaaginnarpata tamanna kinguariartorneruvoq, tassami unammilligassaqarpassuaqarpugut, assersuutigalugu inoqarfiit Pilersuisup pisiniarfeqarfigisai inukilliartorput, 2007-imiit maannamut 1.700-nik inukillisimagamik. Tamannaannarluunniit eqqarsaatigalugu Pilersuisumi kaaviiaartitanik sinneqartooruteqarsinnaanermillu annertuumik tatisivoq.”

Pilersuisup pisortartaava Finn Fabricius, oqarpoq:

”Pilersuisumi pisortanngornissara nuannaarlunga akuersaarpara. Uannut ataqqinaataavoq Pilersuisumi sulisut 600-t siuttuuffigissallugit toqqarneqarnera – sulisorpassuit sineriassuatsinni niuertarfinni quersuarnilu ullut tamaasa sulipput – sulisut piumassuseqarluartut tunniusimasullu Pilersuisumik ullumikkut ilisarisimasatsitut pilersitsisut.

Pilersuisoq KNI-mi ilaavoq, tamannalu nukittoqutaavoq. KNI-mi piginnaasarpassuit ilisimasallu Pilersuisumi atorsinnaasagut atortariaqakkagullu pisinnaavagut. KNI-p iluani immikkoortut akimorlugit suleqatigiinneq tapertareqatigiinnerlu sulinitsinni aallaavigisariaqarparput.

Suliamik nuannarinninneq tulluusimaarutiginninnerlu – oqaatsit taakku marluk uannut isumalerujussuupput. Inuunitta ilarujussua suliffitsinni atortarparput, taamaattumik piffissami suliffitsinniinnitsinni pitsaasumik inuuneqartariaqarpugut – pisisartut suleqatillu naapinnissaat qilanaaralugulu nuannersumik naapittarnissaat aamma eqqarsaatigalugit. Suliagut suliffippullu tulluusimaarutigissavagut. Ikinngutitsinnut allanullu niperput ilumoortoq atorlugu oqartassaagut: “Aap, Pilersuisumi sulisuuvunga.”

Pilersuisumi avaqqussinnaanngilarput ukiuni aggersuni sinneqartooruteqarnerusariaqarnissarput. Tamanna pisariaqarluinnarpoq niuertarfigut sulisunullu inissiaatigut pisoqalisut nutartersinnaaniassagutsigit.” Pilersuisup pisortartaava Finn Fabricius taamatut oqarpoq.