Pilersuisup pisortaa Frederik Olsen
atorfimminit tunuarpoq

Tuniniaanermut pisortaq Finn Fabricius Pilersuisumut pisortaagallartutut inissippoq

Pisortaaneq Peter Grønvold Samuelsen:
- KNI A/S-ip avataani periarfissanik allanik ujarlissalluni Frederik Olsen aalajangersimavoq. Tamaattumik nalunaarutigissavara isumaqatigiissuteqarneq aallaavigalugu Frederik Olsen atorfimminit tunuarmat tamannalu ullumimiit atuutilersoq. Ukiuni KNI A/S-imi sulisimaneranut Frederik Olsen qujaffigerusuppara siunissamilu iluatsitsinissaanik kissaallugu.

Ullumimiit atuutilersumik KNI Pilersuisoq aqunneqalissaaq maannamut tuniniaanermik pisortamit Finn Fabriciusimit. Taanna illoqarfinni anginerni Pilersuisup pisiniarfiinut maannamut pisortaavoq, KNI Pilersuisumilu pisortaagallassaaq niuertarfinnik aqutsinermut pisortassamik atorfinitsitsisoqarnissaata tungaanut. KNI Pilersuisumi sulisut 500-t missaanniipput sumiiffinnilu 66-ni pisiniarfeqarpoq.

Peter Grønvold Samuelsen:
- Neriuppunga Pilersuisumi sulisut Finn Fabricius pisortamissut tikilluaqqulluassagaat. Pisortaagallassaaq atorfiup inuttassaanik nutaamik atorfinitsitsinissatta tungaanut. Suliffeqarfiup sinneratuulli Pilersuisoq annertuunik unammilligassaqarpoq, taamaattumik kivitsiniarnitsinni sulisut pisiniarfinniittut tamarluinnaassa atorfissaqartippagut.

Erseqqissaatigineqassaaq Pilersuisumut pisortap tunuarneranut atatillugu pisortaaneq allamik oqaaseqaqqittussaanngimmat.