Illoqarfinni unammillerfiusuni neqerooruteqartarneq

Inatsisartuni ilaasortaq Kristian Jerimiassen, S, isumaqarpoq Pilersuisoq pisisartuminik immikkoortitsisoq. Tamatumunnga tunngavilersuutigaa Pilersuisup illoqarfinni ataasiakkaani kisimi atuuttuni neqerooruteqartarnera. Kristian Jerimiassenip aamma apeqqutigaa illoqarfinni unammillerfiusuni Pilersuisup neqerooruteqartarnera illoqarfinni unammillerfiunngitsuni pisiniarfiit akilersorneraat.

Pilersuisup pisortaa Frederik Olsen:
- Issittumi inissisimasumi immakkut assartuinermi pissutsit aalajangiisuusarput neqeroorutinik aviisitigut ataatsimoortuni neqeroorutigineqartuni sumi tuniniaasoqartarsinnaanera. Nanortalik, Narsaq, Paamiut Aasiaallu ukiuunerani Royal Arctic Linemit tikinneqartarput, tassanilu uninngasuutit immikkut neqerooruteqarnermut naleqqussarneqarsinnaapput. Akerlianik Qasigiannguit, Qeqertarsuaq, Uummannaq, Upernavik Tasiilarlu ukiuunerani tikinneqarneq ajorput , taamaattumillu immikkut neqeroorutissanik uningaasuutinut sanilliullugit pilersorneqarsinnaasaratik. Illoqarfiilli taaneqartut kingulliit piffissami aalajangersimasumi uninngasuutitik aallaavigalugit namminneq aaqqitaminnik akikilliliinissamut periarfissaqarput.
- Taassuma saniatigut illoqarfinni taaneqartuni kingullerni Pilersuisup pisiniarfiit Namminersorlutik Oqartussanit tapiiffigineqarneq ajorput.