Toqoraavimmiit eqqakkat 100 tonsinik ikilissapput

Avatangiiseqarnermut Naalakkersuisoqarfimmiit avatangiisit pillugit akuersissummik tunineqarnermi toqoraareernerup kingorna Neqi A/S-ip perlukunik siunissami qanoq igitsisarnissaanut annertuumik pisussaaffiliivoq.

Piffissaq sivisooq isumaqatigiinniartoqareersorlu ukiaq 2019 Neqi A/S-imut isumaqatigiissut nutaaq, avatangiisinut tunngatillugu akuersissutigineqartoq, piareerneqarpoq. Taannalu akuersissut piumasaqaatinik annertuunik imaqarpoq, ilaatigut savat savaaqqallu toqunneqareerunik pisataat tamarmik qanoq atorneqassanersut tassani nassuiaatigineqaqqissaarlutik.

Siornatigut neqimiit nerisassiarineqariaannaanngitsut tunisassiarineqariaannaanngitsullu eqqaavissuarmut assaanneqartarnikuupput, isumaqatigiissummili nutaami assersuutigalugu savap puai, tartui allallu qimminut nerukkaatissiarineqartalernissaat piumasarineqarpoq, aammalu aqajarua maqillugu imaanut kuineqassaaq imaluunniit naggorissaatissatut atorneqassasoq, niui, nassui atortuilu minnerit allat ikuallanneqassapput inalugaalu imallit kisimik nunap iluanut assaanneqassallutik.

Tassa imaappoq, siornatigut savap ilivitsup pisatai 9,3 kg nunamut assaanneqartareerluni isumaqatigiissummi nutaami 2,2 kg maanna assaanneqartalissaaq. Taassuma saniatigut qimminut nerukkaatissanik 2 kg-mik sanasoqassaaq, 4,7 kg igitassaq imerpalasoq imaanut iginneqassaaq 1,3 kg-lu ikuallanneqassalluni. Eqqartorneqartut uku savap ataatsip 30 kg-p neqitaaneerpoq. Taakku saniatigut neqip 5 kg missaa sulianut allanut (tingui niaqualu) atorneqassaaq, amia ilanngullugu.

Sinnerutissaarlu savap neqaa 15,5 kg missaaniittoq. Neqi A/S-illu neqi taanna aggortarpaa ukiullu sinneranut nioqqutissiarisarlugu.

- Ataatsimut isigalugu piffissami aalajangersimasumi toqoraasarnitsinni savat 20.000-it toqorarneqarnerini eqqagassat 100 tonsinik ikilineqassapput, Neqi A/S-imi fabrikkimi pisortaq Ole Vestergaard ilisimatitsivoq.

Kommunip suleqatiginera

Isumaqatigiissut siorna toqoraanissaq aallartinngilaartoq inissinneqaraluartoq, piffissami tassani toqoraanissamut aalajangersakkat atuutsinneqalereerput, Neqi A/S-illu savap tamakkiisumik atorneqarnerunissaa sulissutigilerpaa.

Ajoraluartumilli toqoraanerup aallarteqqammernerani paasinarsivoq sulisut amerlanerusut, assersuutigalugu qimminut nerukkaatissanut qerititsisussat, pissarsiarineqarsinnaanngitsut. Taamaattumik Neqi A/S-ip qimminut nerukkaatissat qeritinnissaannut suliniut unitsikkallarpaa.

- Neqinik isaatitsinissaq aallartikkaangat, savaaqqallu Narsamut apuukkaangata, suliaq kigaallisinneqarsinnaaneq ajorpoq, toqoraaneq ingerlaannassaaq, taamaaliornerlu pingaarnersiuineruvoq, Ole Vestergaard ilisimatitsivoq.

Neqi A/S-i Kommune Kujallerlu toqoraanissaq sioqqullugu pineranilu oqaloqatigiittarsimapput, savanik toqoraanerup nalaani sulisussaqarniarneq Narsami ajornarsinnaasartoq ilisimaneqarluarmat. Sulisulli naammattut pissarsiarineqarsinnaasimangillat, periusitoqarlu, tassa toqoraanermi savap pisatai aalajangersimasut nunamut assaanneqartarneri, tamakkiinngikkaluamik uterfigineqarpoq – tamannalu imminut illersorsinnaasumik kommunillu akuerisaanik ilisimasaanillu pivoq.

- Neqi A/S-i Kommune Kujallerlu oqaloqatigiittarnertik sukasarpaat, avatangiisimmi pillugit akuersissutip pitsaasumik sulissutiginiarnera qulakkeertussaagatsigu. Siullertut siorna decembarimi innuttaasunut ataatsimiisitsivugut, tassanilu kommuni Neqi A/S-ilu imminnut assammipput suliniummut tassunga ikioqatigiinniarlutik. Assersuutigalugu illoqarfimmi suliffissarsiortut ikiorlugit piginnaasaannik qaffassaaniarput, tamannalu malitseqarpoq Neqi A/S-ip piginnaanngorsaqqittumut aaqqissuussap iluani sulisut tallimat sulilertissinnaasimammagit. Taassuma saniatigut kommunip illoqarfigisaani nunaqarfigisaanilu allaniittuni sulisussanik tikisitsisinnaaneq kommunip misissussavaa, Ole Vestergaard oqaluttuarpoq.

Neqi A/S-ip ukioq kaajallallugu suliffissanik qulakkeerinninnissaq sulissutigissavaa, soorlu nioqqutissiassanik piareersaanerunissami. Assersuutigalugu nerisassat kissariaannaat annertunerusumik suliareqqilluarneqartarnissaat eqqarsaatigalugu, aammalu sulisunut atugassarititat pitsanngorsarnerisigut, sulinermi timimut nukersorfiit unammillernarsinnaasut annikilliniarsarinerisigut.

Suliniutit allat aamma ilagaat qimminut tamulugassaaqqanik nioqquteqarsinnaalernissaq, aammalu sulissutigineqarpoq ulluinnarni nioqqutissiornermi igitassaqarpallaannginnissaq, soorlu qallersuutit akuleriiaat savaaqqallu akuleriiaat.

Avatangiisinut isumaqatigiissut malinniarlugu Neqi A/S aamma nalunaarsuisarpoq, tassani ullormut toqoraaneq allattoqqissaarlugu Avatangiisinut Naalakkersuisoqarfimmut nassiunneqartarami, kiisalu eqqaavissuup eqqaani eqqakkanut assaavik ukioq manna toqoraanissaq pitinnagu ungalulersorneqartussaalluni.