Nunatsinniit nerisassiat ineriikkat amerlanerusut

Neqi A/S-imiit nerisassiat ineriikkat arlallit nioqqutaareerput, soorlu una savaaraq akuugaq arfininngornersiutissaq.

 

Neqi A/S, Ninu-Arctic Kitchenimi igasoq Inunnguaq Hegelund peqatigalugu, ukiup nutaap aallartinneraniit nerisassianik ineriikkanik qerisunik nutaanik tunisassiulissaaq.

Pisisartut Neqi A/S-imiit nerissasianik ineriikkanik amerlanerusunik toqqagassaqalernissaminnut qilanaarutissaqalerput.

Neqi A/S-imi nerisassianik ineriikkanik nutaanik tunisassiassanik suliaqaleruttorpoq, nerisassiallu ineriikkat nutaat igasoq Inunnguaq Hegelund peqatigalugu suliarineqassapput.

- Savaaraq arfininngornersiut suli tunisaalluarpoq, soorlu savaaqqamik pizzaatigut aamma ingerlalluartut. Misigisimavugulli tassuuna tungaatigut suli iliuuseqarnerusinnaalluta, pisiniarfinnimi nerisassanik ineriikkanik, soorlu Tulippimeersunit Frigodanimeersuniillu, arlalinnik tunisassaateqartarput, kangiamiusullu nerisassiaat qerisut aamma arlallit pigisarpaat. Uagulli isumaqarpugut arlalinnit iluarineqassasoq, nerisassianik taamak ittunik nunatsinneersunik aamma peqalerpat, taamaattumillu nuannaarutigaarput nunatsinni igasut pikkorinnerpaat ilaat isumaqatigiissusiorfigisinnaagatsigu nutaanik pisariitsunik nunatsinneersuniillu nerisassanik ineriartortitsinissamut, Neqi A/S-imi fabrikkimi pisortaq, Ole Vestergaard, paasititsivoq.

Suliniut, KNI-p naleqartitaanut Kalaallit Inuunerat Ilorlermut aamma tulluartoq, Neqip periusissiaanut, tassa suliffeqarfiup ingerlaavartumik ineriartornissaanut ilanngutissaaq. Periusissiaq taanna Neqip anguniagaanut agguakkaniit pingasuniit ikorfartorneqarpoq, ukuusunit; tunisassiat perlukunit sanaat atorluarneqarnerussapput, nioqqutissiassat amerlanerulissapput kiisalu nioqqutissat pigeriikkat pitsanngorsarneqartuassapput.

- Suliniullu una anguniakkamut kingullermut ilaavoq, tassa nioqqutissaatitta pigeriikkatta pitsanngorsartuarnissaat, Ole Vestergaard oqarpoq.

Inunnguaq Hegelundi suleqatigiilernermut nutaamut aamma nuannaarutiginnippoq.

- Suleqatigiilernerput isumalluarnarpoq, kujataaniimmi nerisassiat mamartut taamaasilluta siammarternerusinnaalissavagut. Maanna aallartippugut, tunisassiaalerumaartussallu mamarunartorujussuussapput, oqarpoq.

Neqi A/S-ip aasaq manna ukiassaq ilanngullugu nerisassiassat nutaat inerisarnerannut misiliinernullu piffissaq atussavaa, taannalu ingerlanneqassaaq savanik toqoraaffiup aallartinnissaata tungaanut. Nerisassiassallu ineriikkat nutaat ukiup nutaap aallartinneranut saqqummiunneqarnissaat pilersaarutaavoq.

- Nerisassiat ineriikkat saniatigut suleqatigiinneq una allamik aamma imaqarpoq, tassa nunatsinni neriniartarfinnut nutaanik pitsaanerusunillu neqimik uullisarnissamik immitsinnut siunnersoqatigiittalissaagut, kiisalu Neqip perlukuutaat, soorlu savaaqqap tartui, qinersii allallu, aamma eqqarsaataajumaarput. Allanik aamma suliniuteqarpugut, soorlu pølsit pujuukkat, savaaqqamit, savamit tuttumiillu sanaat. Umimmammiit sanaat aappaagumut kinguartilaarnikuuagut. Tuttu Jerky, tassa tuttut panertut nereriaannaat, maanna aamma misilittarneqaleruttorput, Ole Vestergaard paasititsivoq.

Suliniutit taakku Neqi A/S-ip isertitaanut qaffassaataassasut naatsorsuutigineqarpoq, assinganilli aamma pingaaruteqarpoq ukioq kaajallalugu suliffiusinnaasunik Narsami pilersitsinissaq.

nunatsinniit-nerisassat-ineriikkat-630px-02.jpg

Neqi A/S-imiit ullup qeqqasiut ilaat, taakku Pilersuisoq Narsami maanna tunisaapput.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl