Neqi A/S ooqattaatitsivoq

Kommune Kujalliup aaqqissuussaanut  ‘Sava’-mik taasamut Neqi A/S peqataavoq, tassanilu OIe Vestergaard, Neqimi fabrikkimi pisortaq, Neqimeersunik innuttaasunut ooqattaatitsivoq.

Neqi A/S savaaqqanik panertitanik, savanik pujuukkanik, savaaqqamillu pølsinik pujuukkanik assigiinngitsunik pingasunik, (savaaraq Qajaq-miit immiaaralerlugu, savaaraq hvidløgilerlugu tuttulu chililerlugu) aaqqissuussamut tallimanngormat 18. september Narsap katersortarfiani pisumut innuttaasunut ooqattaatitsivoq.

- Pølsi pujuugaq immiaarartalik alutorineqarnerpaavoq, tuttulu pølsi pujuugaq chilitalik suli chili-taqarnerunissaa oqariartuutigineqarluni. Pujuukkat ingerlaannaq nungunneqarput savaaqqallu panertitat aamma ingerlalluarlutik, taakkulu suli taratsersoqqinneqarsinnaasut innuttaasunit oqariartuutigineqarpoq, Ole Vestergaard paasititsivoq.

Neqi A/S-ip pølsit pujuukkat nutaat ukiup nutaap aallartisimalernerani, februar/marts nalaanni, tunisaalernissaat naatsorsuutigai, neqillu panertitat pujuukkallu 2021-mi aasanngilaattaani tunisaalernissaat aamma naatsorsuutigalugit.