Neqi A/S Kangerlussuarmi umimmannik tunitsivigineqarsinnaassaaq

Kangerlussuarmi ukiuunerani umimmanniarnerup nalaani 25. januarimiit 23. februar 2021 ilanngullugu Neqi A/S umimmaap neqaanik tunitsivigineqaqqissinnaalissaaq.

Taamaalilluni ukiamut umimmaap neqaanik Nunatsinneersumik mamartorsuarmik Neqi A/S-imeersumik Nunatsinni niuertarfinni umimmaminersisoqaqqissinnaalissaaq.

Taamatut periarfissiineq arlalinnut iluaqutaasussaavoq.

Pisisartut umimmaap neqaanik pitsassuarmik Neqimeersumik niuertarfinni pisisinnaalissapput.

Tunitsivimmik ammaaneq pisiortornerup nalaani suliffissanik aqqanilinnik pilersitsissaaq: Toqoraavimmi misilittagallit Narsameersut arfinillit, kiisalu sulisut tallimat Qeqqata Kommuniani Majoriaq suleqatigalugu ikiortaasussat. Tamatuma saniatigut Narsami toqoraavimmi aasaanerani umimmaat neqaasa tunisassiarineqarnerini akunnerit 5.000-it suliffissaqartitsisussaassapput.

Piniartut umimmattamik neqaanik tunitsivimmut nersutip nakorsaanit nakkutigineqartumut tunisisinnaalissapput, umimmaat amiisa pisiortortunut tunisinnaanerisa saniatigut. Neqi A/S KNAPK-lu isumaqatigiissimapput umimmaap neqaa kiilumut 37,50 kr.-ilerlugu Neqimut tunineqartassasoq.

”Neqimiit nuannaarutigaarput aasap kingorna umimmaap neqaanik Nunatsinni pisisartunut tunisassaateqaqqilissagatta. Tamanna Neqimut ilisarnaataalluinnarpoq, soorlumi Neqi A/S-ip ilisarnaataani umimmak ersittoq. Neriuutigivarpullu Kangerlussuarmi umimmaap neqaanik siunissamissaaq pisiortortarsinnaanissarput.” Taamatut oqarpoq Neqi A/S-imi pisortaq Ole Vestergaard.