Neqi A/S-imut tunisat ikileriartut

Ukioq manna Neqi A/S-imi toqoraanermi siornamut 2019-imi toqoraanermut sanilliullugu ikileriaateqarfiuvoq.

Toqoraanermi 337 tonsinik toqoraasoqarpoq imatullu agguataarneqarlutik: 284 tons savaaqqat, 40 tons savat savaaqqallu siornalisat, 6,1 tons nersutaatit kiisalu 6,9 tons tuttut. 2019-imi  toqoraanermi Neqi A/S-ip pissarsiaraa neqi 347,8 tons, tamannalu 11 tonsinik ukioq manna annikinneruneranik isumaqarpoq.

Savat savaaqqallu tunineqartut oqimaassusaat amerlassusaallu appariaateqarput, akerlianilli savaaqqap ataatsip oqimaassusaa agguaqatigiisillugu oqimaannerulaarpoq.

Nersutaatit ataasiakkaarlutik oqimaassusaat appariangaatsiarpoq, tassami nersutit toqorarneqartut amerleriarput – 2019-imi 67-iusinnarlutik 2020-mi 74-inngorput, toqorarneqartulli oqimaassusaat annikilleriarpoq, – 2019-imi toqorarneqartut 7,3 tonsioriarlutik 2020-imi toqorarneqartut 6,1-iupput.

Tuttut eqqarsaatigalugit toqorarneqartut oqimaassusaat amerlassusaallu qaffariarput. Tuttut 2019-imi 159-it 4,5 tonsit toqorarneqarput kiisalu 2020-mi tuttut 249-t toqorarneqarput 6,9 tonsinik oqimaatsigisut. Tuttunik toqoraanerup nalaani sila ajorpallaaqimmat toqoraaneq ulloq ataa-siinnaq ingerlanneqarpoq, tassanilu sulisut ullaaralaakkulli suliartoramik unnuaannakkut sisamap tungaanut sulipput. Sulisut nersualaaqaagut - assaa sulillarassi.

Naatsiiat ukioq manna tunineqartut eqqarsaatigalugut 70 tonsit tunineqarput siorna 105 tonsiusut. Ajoraluartumik naatsiiat tunineqarnerminni 7 tons missaanniittut qerisimallutik ajortissimammata igiinnarneqarput.

Neqi A/S siorna kommunemik suleqateqalerpoq ukioq naallugu atorfiit amerlisarnissaat ilaatigut siunertaralugu. 2020-imi tunisat ikiligaluartut anguniagaq unitsinneqanngilaq. Sulisunik amerlisaanermi suliniutip ingerlatiinnarnissaa anguniarlugu suliniutit makku ilaatigut ingerlanneqarput:

• Tuniniaanermi uullineqanngitsunik ilivitsukkaanilli tuniniaasarneq killilersimaarneqalissaaq, taamaalilluni Neqip tunisassiornermini neqi anginerusoq tunisassiarisalissavaa.
• Siorna savaaqqat ilivitsut tunineqartut 42 tonsiupput. Taakkulu affaannanngortinneqassapput.
• Kangerlussuarmi ukiuunerani umimmanniarnerup nalaani umimmaap neqaanik pisiortoqataasinnaaneq suliniutigineqarpoq.
• Tunineqartartut suli annerusumik tunisassiarineqartarnissaat siunertaralugu maannakkut suliniutinik arlalinnik suliaqartoqarpoq.

Narsami ukioq naallugu atorfiit amerlisarnissaannut Neqi A/S-ip anguniagaqarnerani suliniutit taaneqartut isumalluarfigineqarput - taamalu ililluni Narsami ineriartorneq pitsaasumik sunniuteqaqataaffigineqarluni.

Savaatillit unnersiorput ukioq manna nerukkaatissarissaarnerullutik, taamaattumillu aappaagu savaaqqat amerlanerunissaat naatsorsuutigineqarsinnaasoq.