Narsami savat neqaat qerinngitsut

Narsami Pilersuisumi savat neqaat qerinngitsut tuniniakkat.

Neqi A/S Narsami Pilersuisumut neqinik qerinikuunngitsunik ungaserujussuanngitsumi tunisisalernikuuvoq, massakkullu Pilersuisumi Polaroilimilu sulisut ullup qeqqanut Neqimiit nerisassanik neqeroorfigineqartalerput.

Narsami pisisartut savap neqaanik qerinngitsunik unnukkut igasarianik imaluunniit nunatsinneersunik qallersuutissanik nillataartitsivimmiittunik pisiniarsinnaalernikuupput.

- Savaaqqamik neqeeraliassat, aserortikkat savaaqqallu talii quttoraallu ingerlalluartorujussuupput. Pilersuisumi pisiniarfimmi pisortap Neqimilu neqaarniap neqit toqqagassat assigiinngiiaartuunissaat misissullattaarpaat, apriilimilu uani aningaasat katillugit 6000 koruunimut neqinik qerinngitsunik tunisivugut, Neqi A/S-imi fabrikkip pisortaa Ole Vestergaard paasititsivoq.

Neqip Pilersuisullu suleqatigiinnertik ingerlateqqillugu Pilersuisumi Polaroilimilu sulisut, Neqimi sulisut assigalugit, kissartunik qallersukkanilluunniit ullup qeqqasiortittalerpaat.

Taakku saniatigut igaat kissartut qallersukkallu Neqimeersut Pilersuisumi aamma tunisaapput.

- Pisisartut utertitsisarnerisa paasitippaatigut kissartut qallersukkallu tuniniarneqartut iluarisimaarneqarluartut, miseraqarnerusinnaasulli. Tamanna sulissutigaarput, Ole oqarpoq.

Neqit qerinngitsut tunisaallualereersimasut Narsami Pilersuisumi pisiniarfimmi pisortaq Thomas Kristoffersen paasititsivoq.

- Pisiniartartutta neqiutigut qerinngitsut ilikkarluarnikuuaat, ingerlallualernikuuppullu, Thomas oqarpoq.

Neqinik qerinngitsunik sinerissami tuniniaasinnaaneq eqqarsaatinut aamma ilaavoq, tamannali imaaliallaannariaanngilaq, tassa neqip qerinngitsup tikisinniarnera atasinnaaneralu unammillernartussaammaata Neqi A/S periarfissanik maanna ujaasivoq.

Neqimi nerisarfimmi ikiorti Malvine Nathanielsen nerisassat Pilersuisumukaatassat piareersarpai, Pilersuisumilu sulisut (asseq alleq) nerisassanik aallertarput.