Naatsiiat nunatsinneersut amerlanerusut pisiniarfinni ukioq manna tunisaassapput

Neqi A/S-ip pisiniarfinnut naatsiianik tunisisarnera martsimi isumaqatigiissusiorfigineqarpoq, suleqatigiinnissarlu eqaannerusoq maanna aamma inissilluni.

Pilersuisumut, Brugsenimut Pisiffimmullu Neqi A/S-ip naatsiiat tunisartagaasa amerlassusissaat siusinnerusukkut qulakkeerneqarsinnaasimanngillat, qaqugukkullu naatsiianik nunatsinneersunik pisiassaqartassanersoq ataqatigiilluakkamik isumaqatigiissutit amigaataasimapput, taamaalillutillu pisiniarfiit Danmarkimut naatsiianik pisiniartariaqartarlutik.

- 2019-imi naatsiiat pisiarineqartut misissoqqissaarneqarmata naatsiiat 10 tonsit qerisoortinneqarlutik tunisinnaanngimmata akuerineqarsimanngillat. Neqi A/S-illi naatsiiat taakku akilersimavai, sulisussaaleqineq peqqutigalugu naatsiiat immikkoortiterneri kinguaattoorsimammata, aammalu naatsiaanik naatitsisartoq pigiinnarusukkatsigu. Unammilligassat naatsoorsuutigineqareernikut allat aamma nalaappagut, soorlu naatsiiat amerlanngitsut igiinnartariaqarneri, ajortissimaneri imaluunniit naatsiiaat naasimammata pisiniarfimmiit pisiariumaneqarunnaarneri peqqutallutik. Naatsiiat tuniniarneqarneri aamma kingusinnikuuvoq, savanik toqoraanerup nalaani naammattunik sulisoqarniarneq ajornarsimammat, Neqi A/S-imi fabrikkimi pisortaq Ole Vestergaard oqaluttuarpoq.

Pisiniarfiit naatsiianik qanoq amerlatigisunik pisassanersut qaqugukkullu tamanna pisassanersoq maanna aamma inissinneqarput, taamaalillutik pisiniarfiit piffissami septembarimiit decembarip tungaanut Danmarkimut naatsiiarsiniarnissartik annikillisinnaanngorlugu.

- Naatsiaatitta Neqi A/S-imut, naatitsisartunut inuiaqatigiinnullu isertitatigut iluaqutaanissaat pingaartipparput. Pilersuisumut, Brugsenimut Pisiffimmullu isumaqatigiissutit maanna inissipput, Ole Vestergaard oqarpoq.

Taassuma saniatigut naatsiianik ajoquteqannginnerusunik peqartalernissaq, assersuutigalugu naatsiiat panertunut atugassanik, Neqi A/S-imiit sulissutigineqarpoq, kiisalu neriniartarfiit naatsiianik pitsaasunik nunatsinneersunik aasaanerani pisisinnaanissaat anguniarlugu aamma sulissuteqartoqarluni.