Kangerlussuarmi umimmannik tunitsivik ingerlalluarpoq

Uumasut ameerneqareeraangamik aggugassanngorlugit nivinngarneqartarput.

Neqi A/S-ip Kangerlussuarmi umimmannik tunitsivik 25. januar 2021 ammaqqippaa, tamannalu maannakkumut tigulluarneqarpoq.Kangerlussuarmi ukiukkut umimmanniarneq aallarteqqammerpoq, piniartullu umimmaat ullormut agguaqatigiisillugit 40-50-it tunitsivimmut tunisarpaat.

Taamatut paasititsivoq Viggo Djurhuus, Neqi A/S-imi teknikkimut aqutsisoq.

Viggo Neqi A/S-imilu suleqatini ataaseq ilagalugu umimmannik tunitsiviup sapaatip akunnera sioqqullugu ammannginnerani piareersaajartorlutik Kangerlussuarmukarput. Tunitsiviup ammannginnerani Neqi A/S-ip toqoraavianiit sulisut arfinillit kiisalu sulisussat tallimat, Majoriaq Qeqqata Kommunia suleqatigalugu sulisorineqartussat, aamma tikipput.

- Umimmaat ullormut tigusartakkagut amerlapput taamaattumillu tunitsivimmi sulisut ullormut ulapittaqaat. Ingerlatsineq eqqarsaatigalugu ilaannikkooriarluta unammillernartunik naammattuuisarpugut, taakkuli sapinngisatsinnik aaqqinniartarpagut, Viggo oqarpoq.

Viggop ilanngullugu oqaatigaa umimmaat neqaata pitsaassusaat eqqarsaatigalugu nersutit nakorsaanniit misissoqqaarneqartartut, maannakkumullu umimmaat tunitsivimmut pisut ajoquteqanngillat.

Maannakkumut umimmaat 264-it tunitsivimmut tunineqarput, taakkulu 20 tonsit missaannik oqimaassuseqarput.

Taamaasilluni Neqi A/S umimmaat neqaannik pisiniarfinni ukiamut tunisassaateqalissaaq, tamannalu ukiut tamaasa pisartussatut neriuutigineqarpoq