Savaaqqat Islandimeersut Narsami suliffissaqartitsisut

Savaaqqat Islandimeersut 3000-it missaat maanna Narsami uumasunik toqoraavimmut Neqi A/S-imut apuussimalerput. Tassani suliarineqassapput nioqqutissiarineqarlutik nunatsinnilu niuertarfiit aqqutigalugit tuniniarneqassallutik.

Savaaqqaat pineqartut nioqqutissiarinerat qaammatit tulliuttut marluk Neqi A/S-imi suliassaqartitsissapput. Savaaqqat 1000-jugaangata suliffissat 12-it pilersinneqartarput. 2016-p naanissaata tungaanut savaaqqat allat 7000-it missaat Islandimit tikisinneqarlutik nioqqutissiarineqarnissaat aamma pilersaarutaavoq.

Per Jensen, pisortaq, Neqi A/S:
- Islandimiit nioqqutissiassanik tikisitsivugut Narsami toqoraavimmi suliassaqartitsiinnarumalluta aammalu sulisut piginnaanerilersimasaat annaajumanatigit. Massakkut qanoq iliuuseqanngikkutta sulisunik angerlartitsinissaq periarfissatuaavoq, taamaassappallu fabrikki nutaaliaasoq atorneqarani matugallassalluni.

Nunatsinni savaatillit toqoraavimmut tunisartagaat savaaqqat savallu ukiut kingulliit marluk malunnartumik ikiliartorput, 2015-mi tunineqartut ukiup siulianut sanilliullugu 2.392-nik ikinnerullutik. Pissutsit ukiuni aggersuni taamaaginnarnissaat ilimagineqarpoq, taamaammallu ilisimaneqalereerpoq nioqqutissiorsinnaassuseq tamakkiisoq angussagaanni uumasut 10.000-12.000-nik amerlassuseqartut amigaatigineqarnerat. 

Pissutsit taamaannerat Neqi A/S-imut annertuumik unammilligassaqarpoq. Nunatsinni savaatilinnit tunineqartut amerlinngippata periarfissatuaavoq nioqqutissiassanik avataaniit tikisitsineq, taamaasilluni pisisartut noqqaassutigisaasa tunniunnissaat suliffiillu pingaarutillit pigiinnarnissaat angusinnaaqqullugu.