Nunatta Kujataani naatsiianik katersineq
aallartippoq

Neqimiit nalunaarutigineqarpoq naatsiianik katersineq pisarnermiit ikinnerusunik katersiviusoq, aammali atuisunut tusaruminartoqartoq

Aasaq manna siallerajunnera nillerpallaarneralu ukioq manna naatsiiaanik katersinissamik qaammammik ataatsimik kinguaattoortitsivoq, tassami nillingaarmat naatsiiat kigaatsuinnarmik naajartuaarsimapput. Tamatuma kingunerisaanik Neqimi tunisassiorfiup pisortaata, Viggo Djurhuus-ip, naatsorsuutigaa naatsiiat taamaallaat 60 tonsit katersorneqassasut, tassa siorna katersorneqartunit 110 tonsiusunit ikinnerungaartut.

Atuisunulli aamma tusaruminartumik peqarpoq: Nunatta Kujataani naatsiiat sumilluunniit akuutissalersornagit naatinneqartartut nalinginnaasumik pitsarujussuusarput, kisiannili siullermik naatsiianik immikkoortiteriaaseq, poortueriaaseq uninngatitsinerlu pitsaavallaarsimanngilaq. Taamaattumik 2017-imi Neqi pitsanngorsaanissamik siunnerfilimmik suliniuteqarsimavoq.

Tunisassiorfiup pisortaa Viggo Djurhuus: Naatsiianik naatitsisartut suleqatigalugit naatsiianut tunineqartussanut pitsaassutsimik piumasaqaatigineqartartussat suliarineqarnikuupput. Taamaattumik naatsiiat pitsaanerpaat pisiniarfinni nioqqutigineqarniassammata naatsiiat tunineqarnerini misiligutissanik misissugassatsinnik amerlanerusunik tigusisalernikuuvugut.

Naatsiiat poortorneqarnerminni angissusaasa assigiinngittarnerat atuisunit iluarineqanngittarnikuuvoq, Viggo Djurhuss oqarpoq nangillunilu: Taamaattumik naatsiianik immikkoortiterissumik nutaaliaasumik pisinikuuvugut, taannalu naatsiianik angissutsinut assigiinngitsunut sallaatsumik immikkoortiterisarpoq.

Siusinnerusukkut naatsiianik uninngatitseriaaserput pitsaavallaarsimanngilaq. Siusinnerusukkut ataasiinnarmik naatsiianik uninngatitsiveqarnikuuvugut, massakkulli KNI Engros suleqatigalugu pingasunik qitiusumik uninngatitsivilersornikuuvugut, tassalu maannakkut naatsiiat pitsaanerpaamik uninngatinneqartalerput Nuummi, Sisimiuni Ilulissanilu. Taamaaliornitsigut naatsiiat sivisunerusumik nutaajunissaat qulakkeertarparput Engrosikkullu sukkanerusumik tunisinnaallutigit - tamannalumi pisisartutsinnut naatsiianik pitsaanerusunik pisiassaqartitsisussaavoq.

Maannakkut naatsiiat poortorlugillu Nunatta Kitaanut nassiussuutilereerpavut, maannakkorpiarlu naatsiiat 3 tonsit Nunatsinni Tunumut nassiunneqareerput, Viggo Djurhuus naggasiivoq.

Paasisaqarnerorusukkaanni saaffissaq:

Tunisassiorfimmi pisortaq, Viggo Djurhuus.
Oqarasuaat: 66 11 19
E-mail: vdj@kani.gl