Marmelade nunatsinneersoq

Foto: Sarah Woodall

Neqi A/S Innovation South Greenlandilu nunaqarfinni marlunni ukioq kingulleq paarnartartitsipput. Neqi A/S-illu paarnat marmeladeliarivai pisiniarfinnilu aalajangersimasuni tunisassiarinissaat tullinnguuppoq.

Nunaqarfimmiut paarnanik kigutaarnanillu nuniaatik Pilersuisoq Narsarmijini aamma Alluitsup Paani tunniussinnaanikuuaat, taassuma kingorna paarnat pisiniarfinni taakkunani qeritinneqarput, kingornalu Narsamut Neqi A/S-imut nassiunneqarlutik.

Neqilianik nakkutilliinermut oqartussat Neqi A/S peqatigalugu marmeladeliornissamut pilersaarutit namminerlu nakkutilliinissamut programmi sanavaat. Neqimmi paarnallu ataatsikkut nioqqutissiarineqaqqusaanngillat mingutsitsinissaq eqqarsaatigalugu, taamaattumillu savaaqqanik toqoraanerup unikaallannissaa utaqqeqqaarneqartariaqarsimavoq.

Toqoraavik aasaanerani ulluni 14-ini feeriarnermi matoqqammat taamatullu juulip qaammataani aserfallatsaalineqarluni suliarineqarmat marmeladit kiisami suliarineqarsinnaalerput.
Neqimi toqoraavimmi ilinniartut suliassaq tiguaat. Paarnat qalaanneqarnerat pisariitsumik ingerlavoq, puussaannulli kuiorarnissaannut atortunik amigaateqartoqarsimavoq, tamannali allatut periarfissarsiornikkut aaqqinneqarpoq.

Neqi A/S-illu KNI Marketing peqatigalugu marmeladit puussaata allagartassaat naammassivaat, marmeladillu atajuartussamik tunisaasinnaanerat misissorniarlugu pisiniarfinni aalajangersimasuni tunisassiarineqassapput.

Suliaq una Neqi A/S-imut pissanganarsimavoq ilinniutaalluarlunilu, nioqqutissiassarmi tamatta ilisimalluarparput, taamali annertutigisumik nioqqutissiarineqarnera aamma eqqarsaatigalugu ilinniarfiuvoq – taakkulu saniatigut Neqip Innovation South Greenland peqatigalugu uuma suliniutip kujataani suliffissanik pilersitsisinnaanersoq misissuiffigeqataaffigaat.

Marmelade illoqarfinni annerni Brugsenimi Pisiffimmilu, Narsami Sumik II kioskimi kiisalu Kangerlussuarmi Duty Freemi oktoberip ingerlanerani tunisaalissaaq.

Qaammatialuillu qaangiuppata Neqip Pisiffik Brugsenilu suleqatigalugit marmeladip tunisaanera qanoq innersoq nalilersuiffigissavaat. Taassumalu kingorna Neqi rapportiliussaaq, tassanilu paasinarsissaaq marmelade aappaagu aamma nioqqutissiarineqaqqissanersoq imaluunniit Innovation South Greenlandimut rapporti tunniunneqassanersoq, tassani paasineqarsinnaalluni nammineq aallarnisaaniaraanni qanoq iliorluni marmelademik tunisassiorneq ingerlanneqarsinnaanersoq.