Aasarissaarnerata Neqi A/S kisitsisigissaartippaa

Narsami Neqi A/S-imut ukioq manna ulapaarfiusimavoq. Ukiaq manna savaaqqanik assartuineq toqoraanerlu naammassipput. Naatsiianik, savaaqqanik tuttunillu tigooqqaanerit siuariarfiupput.

Kalaallit nerriviinut naatsiiat Nunatsinneersut amerlanerusut

2018-imi aasaq nillerlunilu assut isugutassimasoq 2019-mi aasarissaarnermik taarserneqarpoq. Tamannalu naatsiianik naatitsisartunut iluaqutaasimavoq, Neqi A/S-imummi naatsiiat 105 tons tunineqarput. Siuariaat 54 tons imaluunniit 106 % ukiup siulianut sanilliullugu, 2019-mimi tunisat 51 tons-iinnaasimammata.

Naatsiiat amerlanerusut tunineqaannanngillat, aammattaarli naatsiiat pitsaassusii pitsanngoriarfiupput. Naatsiiat Neqi-mut tunineqartut passunneqartarneri aamma pitsanngoriartinneqarpoq, tassa isugutakkunnaartereerlugit aatsaat poortorneqartalermata, taamaalilluni oqunnissaralui pinngitsoortinneqarlutik. Neqi-mut tunineqareeraagata ulluni 14-ni panerseqqaarneqartarput poortorlugit nassiussuunneqalinnginnerini. Naatsiiat pitsaassusiisa misissornerini aamma kasiilikkat ikinnerujussuusimapput. Pisisartut qilanaariinnarsinnaavaat naatsiiat Nunatsinneersut pitsassuit mamarnerusut pisiniarfinni pisiarinissaat.

Savaaqqanik savanillu tunisat 2014-ip kingorna aatsaat taama pitsaatigipput

Pisisartut aamma qilanaarutigisinnaavaat savaaqqat Nunatsinneersut piumaneqarluartut mamartorsuillu. Savaaqqanik tunisineq siuariarfiuvoq. Savaaqqat tunisat 8 %-mik 2018-imut sanilliullugu amerlanerupput tassa 1.376 savaaqqat amerleriaataagamik. Nunap panerneranik pissuteqartumik savaaqqat agguaqatigiissillugu oqimaassusiat 0,7%-mik appariarfiugaluarpoq, taamaattorli savaaqqat toqorarneqareerneqartut katillugu oqimaassutsimikkut siuariaataat 18.842 kg-voq.

Tamatuma saniatigut savat tunineqartut 6 %-mik siuariarfiupput, 2018-imut sanilliullugu 96-nik amerlanerusut tunineqarmata.

2014-mili taamatut angusaqartoqarmat aatsaat taama pitsaatigisumik angusaqartoqaqqippoq.

Tuttut tunineqartut amerleriarput

Tuttut Neqi-mut tunineqartut aatsaat taama amerleriartigipput. 2018-imi tuttut 61-it tunineqarsimapput, ukioq manna 159-iullutik. Siuariaat tuttut 138 imaluunniit 221 %. Tamatumunnga pissutaavoq Narsap eqqaani tuttuuteqarfimmi piffissaq sivisunerusoq atorlugu katersisoqarsimanera. Taamaalilluni tuttut amerlanerusut Neqimeersut pisiniarfiit qerititsiviini siumorneqarsinnaalernissapput.