Savaaqqat ikinnerusut tunineqarput

Savaaqqanik, savanik nersutinillu ukiormanna toqoraaneq iluatsilluartumik naammassivoq. Uumasunik ukiormanna toqoraanermi sulisut 80-upput, 2014-mut sanilliullugu 15-nik amerlanerusut, suleqataappullu aamma Uumasunut Nakorsaqarfimmeersut. Naatsiianik poortuineq kiisalu qimminut nerisassanngorlugit savaaqqat savallu iloqutaannik nioqqutissiorneq sulisut amerlanerulernerannut patsisaavoq.  

Nersutit pillugit
2014-mut sanilliullugu 17-nik amerlanerusut ukiormanna toqoraavimmut tunineqarput, ukiormanna tunineqartut 46-llutik siorna tunineqartut 29-llutik.

Narsap eqqaani Tuttutuumi tuttuutillit ilaqutariit Janussenikkut tuttunik ukiormanna Neqi A/S-imut tuniseqqinnerat Neqi A/S-ip nuannaarutigaa. Ilaqutariit Janussenikkut tuttut 87-it Neqi A/S-imut tunivaat.  

Savaaqqat savallu pillugit
2014-mut sanilliullugu savaaqqat savallu 2.392-nik ikinnerusut ukiormanna toqoraavimmut tunineqarput, ukiullu siulianut sanilliullugu savaaqqat 1,3 kg-mik oqinnerupput. Ikileriaat kaaviaartitanit 2 mio kr. missaannik naleqarpoq.

Katillugit 19.938-it toqorarneqarput; savaaqqat 18.425-it savallu 1.513-it.

Savaaqqat tunineqartut ikileriartut

Frederik Frederiksen, Savaatillit Peqatigiiffiit Suleqatigiissut, siulittaasoq:
- Savaatillit missingersuutiminnit 1.000-t missaannik ikinnerusunik savaaqqanik tunisisarnerat takornartaanngilaq, takusinnaavarpulli savaaqqat tunisat ilimagisamiit marloriaammik ikinnerusut. Ukiormanna ukiorluppugut aasaaneranilu panernersuaqarneranik eqqugaalluta. Tamanna tunisat amerlassusaannut oqimaassusaannullu sunniuteqarpoq.

- Ilorraap tungaanut aallassappat silap pitsaanerunissaa neriuutigissavarput, aaqqiissutaasinnaasulli ilagaat savaatillit amerlanerulernerat taamalu uumasunik toqoraavimmut pilersuinerup aalaakkaanerulernera.  

Per Jensen, pisortaq, Neqi A/S:
- Ukiut siuliinut sanilliullugu savaaqqat savallu tunisat ikinnerulernissaannik ilimasunnerput ajoraluartumik ukiormanna uppernarsivarput. Aamma ilimagivarput pissutsit ilorraap tungaanut ingerlalernissaat ukiut arlallit qaangiuppata aatsaat pisinnaassasoq. Taamaattumik savaatilinnut uumasunillu toqoraavimmut iluaqutaasussamik aaqqiissutissamik nassaarniarnitsinni Namminersorlutik Oqartussat peqataanissaat pingaaruteqarluinnarpoq aalajangiisooqataassallunilu.

Uumasunik toqoraanerup nalaani akuusimasut sulilluarsimasullu, minnerunngitsumik sulisut uumasunillu nakorsaqarfimmiut, Neqi A/S-ip qutsavigiumavai.